سوپای ئیسرائیل لە میحوەری نەتساریم لە ناوەڕاستی کەرتی غەززە، کشایەوە.
میدیاکانی ئیسرائیل بڵاویان کردەوە کە ئەمڕۆ یەکشەممە، سوپای ئیسرائیل لە میحوەری نەتساریم ناوەڕاستی غەززە، کشاوەتەوە.
ماوەی زیاتر لە یەک ساڵ و سێ مانگە میحوەری نەتساریم ناوەڕاستی غەززە کە باکووڕ و باشووری غەززە لە یەکتر جیا دەکاتەوە، لەلایەن سوپای ئیسرائیلەوە داگیرکرابوو.
لەوبارەیەوە میدیای فەرمی ئیسرائیل (KAN) بڵاوی کردەوە: “ئەمڕۆ یەکشەممە لە چوارچێوەی قۆناغی یەکەمی ڕێککەوتنی ئاگربەست و ئاڵوگۆڕی دیلەکان، سوپای ئیسرائیل لە میحوەری نەتساریم، کشاوەتەوە”.
ھاوکات کەناڵی ١٣ی ئیسرائیلی بڵاوی کردەوە کە سوپای ئیسرائیل سەرەڕای کشانەوەی لە میحوەری نەتساریم، لە میحوەری فیلادلفیا سنووری نێوان غەززە و میسر دەمێنێتەوە.
