بەڕێوەبەری بانكی خانەنشینی پێشمەرگە ڕایدەگەیەنێت، لە مانگی داهاتووەوە كێشەی موچەی خانەنشینانی پێشمەرگە چارەسەر دەكرێت و وەك پێشوی لێدێتەوە.
ئەمڕۆ لە سلێمانی ژمارەیەک لە خانەنشینانی پێشمەرگە دژی بڕینی بەشێک لە مووچەکانیان گردبونەوە و وەک خۆیان دەڵێن، نزیکەی پێنج هەزار ئەفسەر و پێشمەرگەی خانەنشینن بەبێ گەڕانەوە بۆ ساڵانی خزمەت و پلەکەی خانەنشین کراون و بڕێکی زۆر پارەیان لێبڕاوە.
دەشڵێن: بڕیاری بڕینی مووچەی خانەنشینان تەنها لە سلێمانی جێبەجێکراوە، خانەنشین هەیە بڕی 500 هەزار دینار لە مووچەکەی بڕاوە.
بەوتەوی ئەو خانەنشینانە، ئەوانەی پارەیان لێبڕاوە خاوەنی نزیکەی 30 ساڵ خزمەتن و کەمترین خزمەت 25 ساڵە کە پارەی مووچەی لێبڕاوە.
لای خۆیەوە عەزیز عەلی، بەڕێوەبەری خانەنشینی پێشمەرگە ڕایگەیاند: ئەو پارەیەی لە مووچەی مانگی یەك لێیان بڕاوە، لەگەڵ مووچەی مانگی دوو بۆیان قەرەبوو دەكرێتەوە.
