بەهۆی بارینی بەفر و سەرماوسۆڵەی بەهێز و ئەگەری بەستنی شەقامەكان، سبەینێ لە خوێندنگە و باخچەكانی سنووری سلێمانی كرا بە پشووی فەرمی.
بەڕێوەبەرایەتی گشتی پەروەردەی سلێمانی بڵاویکردەوە، سبەینێ یەک شەممە ٢٠٢٥/٢/٩ بەهۆی نالەباری کەشوهەوا و لە پێناو پاراستنی سەلامەتی گیانی خوێندکاران و مامۆستایان لەسەرجەم قوتابخانە و خوێندگە ناحکومییەکانی سنووری بەڕێوەبەرایەتی گشتیمان پشووە.
ڕاشیگەیاندووە، بەڕێوەبەری پەروەردەکانی سنووری بەڕێوەبەرایەتی گشتیمان سەرپشک کراون بە هەماهەنگی لەگەڵ سەرۆکی یەکە ئیداریەکانیان بۆ بڕیاردان بە پێی بارودۆخی کەشوهەوای سنوورەکانیان سەبارەت بە پشووی سبەینێ.
لای خۆشیەوە، ئامادەیی بڵند بڵاویكردۆتەوە، بە لەبەر چاوگرتنی ڕەوشی پێشبینیکراوی کەش و هەوا سبەی یەک شەممە 9ی 2 ی 2025، پشووی فەرمی دەبێت.
هاوكات، خوێندنگەی لیدەرزی ناحكومی بڵاویكردۆتەوە، سبەینێ بەهۆی دۆخی كەشوهەواوە دەكرێتە پشووی فەرمی.
بۆ بەدواداچوونی زیاتر (خەڵك) پەیوەندی كرد بە د. هەڤاڵ ئەبوبەكر، پارێزگاری سلێمانی، بەڵام پەیوەندییەكەی بەردەست نەبوو. هاوكات تا ئێستا هیچ بڕیارێك بۆ پشووی فەرمانبەران ڕانەگەیەنراوە.
ئەمە لەكاتێكدایە، كە لەسەرجەم خوێندنگە و باخچە حكومییەكان لە سنووری سلێمانی و هەڵەبجە و ئیدارەكانی گەرمیان و ڕاپەڕین و كۆیە بەهۆی بێ مووچەییەوە بایكۆتە و دەوام نییە، جگە لە خوێندكارانی پۆلی 12ی ئامادەیی.
