مامۆستا عەبدوللەتیف ئەحمەد، ڕابەری ڕەوتی سەلەفیەت لە هەرێمی كوردستان ڕایدەگەیەنێت، گەورەترین گورز كە لەو میللەتە دراوە خواردن و دواخستنی مووچەی خەڵك و بڕینی قووتی خەڵكە.
د. عەبدوللەتیف ئەحمەد لە چاوپێكەوتنێكی تەلەفزیۆنیدا وتی، هەم بەغدا غەدری لە مووچەخۆران كردووە و هەم حكومەتی هەرێم غەدری لە مووچەخۆران كردووە و زۆریش.
ئاماژەی بەوەشكرد، سەركردە و بەرپرسەكانی هەرێمی كوردستان دوای ڕوخانی ڕژێمی سەدام لە بەغدا هەلی زۆریان لەبەردەمدا بوو كە زۆر شتی گەورە بكەن، چونكە بەغدا هیچ نەبوو ، حكومەتی ناوەندی هیچ بوونێكی نەمابوو، بەڵام ئەوەیان نەكرد، ئێستا هەر حزبێك ئەوەندەی هەوڵ دەدات خۆی گەورەتر بكات و خۆی بهێڵێتەوە، ئەوەندە هەوڵی بۆ گەلەكەی نەداوە.
وتیشی، “گەورەترین گورز كە لەو میللەتە دراوە خواردن و دواخستنی مووچەی خەڵك و بڕینی قووتی خەڵكە، ئێ ئەمە خوای گەورە قبوڵی ناكات، بۆچی چارەسەرێكتان بۆ نەدۆزیوەتەوە؟”.
جەختیشی كردەوە، “كەسێك كە بەرپرس بێت یان دەبێت بڵێت من دەتوانم مافی میللەتەكەم دابین بكەم، یان دەبێت بڵێت من ناتوانم و ڕادەستی یەكێكی تری دەكەم”.
