بەرپرسی پێشووی دەزگای پاراستنی پارتی ڕایدەگەیەنێت، ناسەقامگیری لە بەرژەوەندی گەلی کوردستان نیە و دەشڵێت: مانگرتووانی سلێمانی خاوەن هەر بۆچونێکی سیاسی بن، بەشێکن لە جەستەی ئەم کۆمەڵگایە.
نەزهەت حالی، بەرپرسی پێشووی دەزگای پاراستنی پارتی لە نووسینێكدا سەبارەت بە خۆپیشاندان و مانگرتنی فەرمانبەران و مامۆستایان دەڵێت: مانگرتووانی سلێمانی خاوەن هەر بیر و بۆچونێکی سیاسی بن، لەبەر باردۆخی ژیانی خۆیان و خەڵک وەکو خەباتی مەدەنی پەنایان بۆ ئەو کارە بردبێت، بۆ ئەوەی پەیامەکەیان بە لایەنە پەیوەندیدارەکان بگات.
دەشڵێت: هەم پارتەکانی دەسەڵات و ئەوانەی دەرەوەی دەسەڵاتن لەسەریانە زیاتر درک بە هەستیاری ئەم بارودۆخە بکەن و ڕێگە نەدەن دۆخەکە بشێوێندرێت و ڕووداوی نەخوازراو ڕوو بدات کە پەشیمانی بەدوادا بێت.
دەقی نووسینەكە:
مانگرتووانی سلێمانی خاوەن هەر بیر و بۆچونێکی سیاسی بن، لەبەر باردۆخی ژیانی خۆیان و خەڵک وەکو خەباتی مەدەنی پەنایان بۆ ئەو کارە بردبێت، بۆ ئەوەی پەیامەکەیان بە لایەنە پەیوەندیدارەکان بگات، یان تەنانەت لەلایەن لایەنێکی سیاسی هان درابن بۆ ئەو کارە ، ئەوان ژمارەیان کەم بێت یان زۆر، بەشێکن لە جەستەی ئەو کۆمەڵگایە و ئازاری هەر بەشێکی جەستە ئازاربەخشە بۆ هەموو جەستەکە.
پێم وایە لەو بارودۆخەدا نە بە قسەی زبر نابێت شعوری ئەو کەسانە بریندار بکرێت بۆ ئەوەی لە ڕقان ناچار نەبن بەردەوامی بدەن بە مانگرتن، نە بە پێدا هەڵگوتن نابێت هان بدرێن بۆ بەردەوامیدان بە مانگرتن لەخواردن، لەبەرئەوەی لەو زستانەدا و لەسەرمایە بەوشێوەیە سەلامەتی و تەندروستیان دەکەوێتە بەر مەترسی و گرنگە کارێک بکرێت بەڕێزەوە کۆتایی بە مانگرتنەکەیان بهێنن.
ئێمە دەوڵەتێکی سەربەخۆ نین، تەنانەت هەرێمێکی بەتەواو یەکگرتووش نین، لەنێوان ئامانج و دروشمە شۆڕشگێڕییەکانی ڕابردوو و واقعی ئێستاش جیاوازی زۆر هەیە، ئەو واقعە جێگای نیگەرانی زۆرێک لەو کەسانەشە کە لە ڕابردوو بۆ داهاتووی گەلی خۆیان قوربانیان داوە و بەهۆی ئایندە بینینیان نیگەرانن و مەترسیان لە ئاڵۆزبوونی زیاترو ناسەقامگیری هەیە.
لە ئێستادا بە لەبەر چاو گرتنی زۆر فاکتەری ناوەخۆی و هەرێمی و جیهانی، گەلی کوردستان زۆر پێویستی بە سەقامگیری هەیە، بە تێڕوانین لە ژینگەی سیاسی و ئەمنی ناوچەکە بە باوەڕی خۆم ئەنجامدانی خۆپێشاندان یان بەردەوامی بە مانگرتن لە خواردن لە بەرژەوەندی گەلی کوردستان و کۆی پرۆسەی سیاسی و سەقامگیری لە هەریمی کوردستان نیە. لەو کاتەی کە لایەنە براوەکانی هەڵبژاردن خەریکی پێکهێنانی حکومەتن، ئاڵۆزکردنی بارودۆخەکە بە باش نابیندرێت.
لایەنەکانی ئۆپۆزیسیۆن لەسەریانە هەست بە بەرپرسیارێتی زیاتر بکەن و خۆیان بۆ خەباتی پەڕلەمانی ئامادە بکەن.
هەم پارتەکانی دەسەڵات و ئەوانەی دەرەوەی دەسەڵاتن لەسەریانە زیاتر درک بە هەستیاری ئەم بارودۆخە بکەن و ڕێگە نەدەن دۆخەکە بشێوێندرێت و ڕووداوی نەخوازراو ڕوو بدات کە پەشیمانی بەدوادا بێت.
هۆشیاری گەلی کوردستان بۆ پاراستنی سەقامگیری دەتوانێت ڕۆڵیکی زۆر بگێڕێت بۆ دەرباز بوون بە سەلامەتی لەو قۆناغەدا و بۆ بەگەیشتن بە قۆناغێکی نوێ، بۆ ئەوەی ریفۆرمێکی ڕاستەقینە و دراسەتکراو لە هەموو کایەکانی حوکمڕانی ئەنجام بدرێت.
