بڕیارە سبەینێ خۆپیشاندانی سەرتاسەری لە هەموو شار و شارۆچكەكانەوە بە مانگرتووانی سلێمانیشەوە ببرێتە هەولێر و لە بەردەم نەتەوە یەكگرتووەكان داوای مافی مووچەخۆران بكەن، هەریەكە لە یەكگرتووی ئیسلامی و ڕەوتی هەڵوێست پاڵپشتییان بۆ خۆپیشاندانەكە دەربڕی.
ڕەوتی هەڵوێست لە ڕاگەیەنراوێكدا ئاماژەی بەوەكردووە، لە یەکەم ڕۆژەوە پشتیوانی خەباتی مەدەنی مامۆستایان و فەرمانبەران بووە و ئێستاش پشتیوانی هەموو هەنگاوێکی مەدەنی دەکەین لە پێناوی مافەڕەواکانی مووچەخۆراندا.
دەشڵێت: پێویستە دەسەڵاتداران و هێزە ئەمنیەکانی هەولێر هیچ ڕێگریەک لە مووچەخۆران و فەرمانبەران نەکەن لە بازگەکان و پێویستە دەسەڵاتداران لەبری ڕێگریکردن، گوێ لە خواستەڕەواکانی مووچەخۆران بگرن.
لای خۆشیەوە، مستەفا عەبدوڵا، سەرۆكی فڕاكسیۆنی یەكگرتوو بانگەوازێك ئاڕاستەی مامۆستایان و فەرمانبەرانی هەولێر دەكات و داوایان لێدەكات، سبەی مانگرتنی سەرتاسەری ڕابگەیەنن.
فراکسیۆنی یەکگرتوو هەروەها پشتیوانیشى دووپات کردەوە بۆ ئەو مامۆستایانەی بڕیارە لە سلێمانییەوە بێنە هەولێر و خۆپیشاندان لەبەردەم بارەگای نەتەوە یەكگرتووەكان ئەنجامبدەن.
سەرۆكی فڕاكسیۆنی یەكگرتوو وتیشی”حكومەتی هەرێم فاشیل و خەمساردە بەرامبەر بە داواكاریەكانی خەڵكی كوردستان، لەجیاتی ڕێگری لەخۆپیشاندان و گردبونەوە و تۆمەت دروستكردن بۆ مامۆستا وفەرمانبەران دروست بكات، باشترە گوێیان لێبگرێت و داواكارییەكانیان جێبەجێبكات”.
