وتەبێژی یەکێتی وادەی کۆبوونەوەی ئەنجوومەنی سەرکردایەتی یەکیتی ئاشکرا دەکات و دەڵێت” رەشنووسێک بۆ تەعریفکردنی دەسەڵاتەکان و شێوازی کارکردن لەسەر بنەمای شەراکەتی حەقیقی ئامادە دەکرێت”.
سەعدی ئەحمەد پیرە، وتەبێژی یەکێتی نیشتیمانی کوردستان، بەمیدیای یەکیتی ڕاگەیاندووە، لە کۆبوونەوەی ئەمڕۆی مەکتەبی سیاسیدا کە بەسەرپەرشتی بافڵ تاڵەبانی بەڕێوەچوو چەند پرس و تەوەرێکی گرنگی رێکخراوەیی و جێیبایەخی کاری سیاسی و هەروەها بابەتە چارەنوسسازەکانی هەرێم و عیراق و ناوچەکە تاوتوێکراون .
ئاماژەی بەوەشدا، ئەنجامی کارەکانی ئەو لیژنە تەکنیکییەی یەکێتی کە پێکهێندرابوو بۆ ئەوەی لەگەڵ پارتی کاربکات بۆ دیاریکردنی دەسەڵاتەکانی هەرێم و پرسی پێکهێنانی کابینەی نوێی حکومەتی هەرێم تاوتوێ کران، هەروەها پرسی ئامادەکردنی رەشنووسێک بۆ تەعریفکردنی دەسەڵاتەکان و شێوازی کارکردن لەسەر بنەمای شەراکەتی حەقیقی و هابەشێتی و نەهێشتنی کەموکوڕییەکان کە پێشترهەبووە ، و چەند پرسێکی دیکەی پەیوەست بە چارەسەرکردنی کێشەکانی ژیانی خەڵکی کوردستان گفتوگۆیان لەبارەوە کرا.
سەعدی پیرە ڕاشیگەیاند، لە چەند رۆژی داهاتووشدا ئەنجوومەنی سەرکردایەتی یەکێتی بەسەرپەرشتی بافڵ تاڵەبانی سەرۆکی یەکێتی کۆدەبێتەوە بۆ گفتوگۆکردنی زیاتر لە ئەو پرسە گرنگانەی کە لە کۆبوونەوەی مەکتەبی سیاسی باس کران لەوێش وتوێژی وردتریان لەسەر دەکرێت.
