دەربارەی ڕوانگەو ڕۆڵ و پێگەی ھەرێمی كوردستان لە پرسی گۆڕانكارییەكانی سووریا، هێمن هەورامی، لەگەڵ بەرپرسانی باڵای وەزارەتی دەرەوەی ئەمریكا كۆبووە و وەك هێمن هەورامی دەڵێت: بەرپرسانی باڵای وەزارەتی دەرەوەی ئەمریكا بە بایەخەوە پێگە و ڕۆڵی بارزانی لە نزیكتركردنەوەی لایەنە كوردییەكان ھەڵسەنگاند.
هێمن هەورامی، ئەندامی مەكتەبی سیاسی پارتی دیموكراتی كوردستان لە وەزارەتی دەرەوەی ئەمریكا لەگەڵ تۆم رۆسنبێرگەر، جێگری یاریدەدەری وەزیری دەرەوە بۆ كاروباری سووریا و ناوچەكە و سكۆت بۆڵتز، نێردەی تایبەتی ئەمەریكا بۆ كاروباری باكووری ڕۆژھەڵاتی سووریا كۆبوویەوە.
بەپێی ڕاگەیەنراوی كۆبوونەوەكە، كە میدیای حزبەكەی بڵاویكردۆتەوە، هێمن هەورامی، ھەوڵ و ھەنگاوەكان و پەرۆشی بارزانی بۆ ئاشتی و سەقامگیری و یەكڕیزی كورد لەگۆڕانكارییەكان، بۆ بەرپرسانی باڵای وەزارەتی دەرەوەی ئەمریكا خستە روو.
دەشڵێت: لە بەرامبەردا، بەرپرسانی باڵای وەزارەتی دەرەوەی ئەمریكا بە بایەخەوە پێگە و ڕۆڵی بارزانی-یان ھەڵسەنگاند لە نزیكتر كردنەوەی لایەنە كوردییەكان و بەردەوامی ئەم ھەوڵانەیان بە پڕ بایەخ وەسف كرد.
هێمن هەورامی وتیشی: لەسەر دۆخی قۆناغی گواستنەوە لە دیمەشق و دۆخی ئاسایشی سووریا و لێكەوتەكانی بۆ ئاسایشی ھەرێمایەتی و ھەماھەنگی زیاتر لەگەڵ ھەرێمی كوردستان بۆ بەرژەوەندی و ئارامی گشتی ناوچەكە، گفتوگۆیەكی وردمان لەگەڵ بەرپرسانی باڵای وەزارەتی دەرەوەی ئەمریكا ھەبوو.
