ئیسرائیل لە چۆنیتی ئاڵوگۆری دیل و بارمتەکانی ئەمرۆ توڕەیە و دەڵێت” ئەو ڕەفتارەی ئەمڕۆ بەئاسانی تێناپەڕێت”.
ئەمڕۆ شەممە، نووسینگەی سەرۆکوەزیرانی ئیسرائیل، بنیامین ناتانیاهوو ڕایگەیاند، “دیمەنە سەختەکانی ئەمڕۆ کە بینیمان لەکاتی ڕادەستکردنی 3 بارمتەی ئیسرائیلی لە لایەن حەماسەوە، هەروا بە ئاسانی تێناپەڕێت”.
لە بڵاوکراوەکەی نووسینگەکەدا هاتووە، دوای دەرکەوتنی بارمتەکان لە دۆخێکی لاوازدا و ڕاپێچکردنیان بۆ سەر ستەیجی ڕادەستکردن و ناچارکردنیان بۆ ئەنجامدانی چاوپێکەوتن لەگەڵ چەکدارانی حەماس، ئیسرائیل ئەو دیمەنە شۆکهێنەرانە لەبیر ناکات.
جێی ئاماژەیە ، ئەمڕۆ شەممە کاروانێکی تری ئاڵوگۆری دیل و بارمتەکان لەلایەن ئیسرائیل و حەماسەوە بەڕێوەچوو، ئەوەی جیاوازبوو ئەمڕۆ بارمتەکانی ئیسرائیل لەسەر ستەیجیک نمایشکران، کە بەچەند فلێکسێک داپۆشرابوو، لە یەکێک لە پۆستەرەکان نووسرابوو “ئێمە تۆفانین، ئێمە ڕۆژی داهاتووین” لەسەر یەکێکی دیکەش، وێنەیەکی نەتانیاهوو لەگەڵ وێنەی ژمارەیەک تانکی تێکشکاوی ئیسرائیلی دەردەکەون.
