چینیەکان سەرەڕای داناییان توانیان شورایەکی تووند وتوڵ درووست بکەن بۆپاراستنی چین و چینیەکان لەهێرشی نەخوازراو. کەچی لەماوەی دەیان ساڵی تێپەڕبوو بەسەر درووستکردنی شووراکەدا، سێ هێرشی گەورە کرایە سەرچین وتێکشکان، چونکە نەیاتوانیبوو پاسەوانەکەی بنیاتبنێن.
هەرجارێک لەبەرانبەر وەرگرتنی بەرتیل لە دووژمنان خیانەتی لەووڵاتەکەی دەکرد ودەرگای دەکردەوە تا داگیرکەران پچنە ژوورەوە.
وەک بەندە ناڕازیم لەم دۆخە و لەقووتی خۆم خۆشنابم، بەڵام دەبێت بزانین تف هەڵدان ڕووی خۆمان دەگرێتەوە. ووتویانە؛ سەرم ببڕە نانم مەبڕە. دڵنیام بەئیزنی خوای میهرەبان ئەم دۆخە باشتر دەبێت ودەبووژێینەوە. هەرچەند ماندووبووین لەڕووی ئابووریی و کۆمەڵایەتی و دەروونیەوە و قوربانیمانداوە، بەڵام ئاسۆی هیوا ڕوونە و ئەمەش تێ دەپەڕێت.
داخەکەم قسەی ناشرین وتەشهیر وسنووربەزاندن و بێ مۆڕاڵی وبێ ئیتیکی هەندێ میدیا ومیدیاکار (لەگەڵ ڕێزم) هاندانیان بۆ هەندێک هاووڵاتیان جا دڵ گەرمبن یان بەئەنقەست دزێوبن وسیفاتی هاووڵاتیبوونیان تێدا نەبێ بۆتە درووشمی سەر ڕووپەڕی سۆشیاڵ میدیا و مانشێتی زەق و هەواڵ.
ئاشکرایە دیاردەی قسەی ناشرین و بێ تەربێتی وسنووربەزاندن ئەگەر ئاوا بەردەوام بێت کارەساتە و هاووڵاتیبوون لە قەیراندایە و ئایندەی نەوەی نوێ لەمەترسیدایە. دڵنیام دۆخەکە باش دەبێت، بەڵام مۆرکی ناشرینی و نابەرپرسیارێتی لەئەرکدا ناسنامەی کوردبوون ناشرین دەکات.
بەڕای بەندە پێویستە پرۆژەیاسایەک لەپەرلەمان گەڵاڵە بکرێت بۆ بەرژەوەندی ئاسایشی کۆمەڵایەتی و نەتەوەیی کە سزا وپێبژاردن دیاری بکات بۆ ئەو هاووڵاتیە نابەرپرسانەی کە بەڕاست و چەپدا قسەی ناشرین و هەڵوێستی ناشرینیان هەیە بەرانبەر بەدام ودەزگا حکومیەکان؛ چونکە ئەمە لەخانەی ئازادی بیروڕا دەچێتە خانەی نانیشتیمانی و سیفاتی هاووڵاتی خراپ دەردەخات، هەر بۆیە پێویستە پەرلەمانیش تەواو ڕۆڵی خۆی ببینێت لە چاودێریکردنی حکومەت و دانانی دەستوورێک، کە هاووڵاتیبوون تێیدا ڕەنگدانەوەی هەبێت و مافەکانی هاووڵاتیانی تێدا فەراهەم بکرێت و جێبەجێکرێت.
نەک وەک یاسای ڕێکخستنی خۆپیشاندانی هەرێمی کوردستان پێشێلکاری تێدا بکرێت. لێرەدا دەمەوێ بڵێم ئەرکی زانایانی پەروەردە و خوێندنی باڵاویاساناسان و ئابووریناسان و دەروونناسان و بەتایبەت زانایانی ئاینیە کە چاودێری ئەم دۆخە بکەن و نەهێڵن هیچ لایەن و کەسێک دەستێوەردان بکات لە هەڵوێست و داواکاری مانگرتووەکان و هاندەربن بەتایبەت لەڕێیی لیژنەی فەتوای هەرێمەوە کە هەڵوێستێکی ئاینیی مرۆیی هەبێت لەسۆنگەی خۆشەویستی نیشتیمان لە ئیمانەوەیە بەتایبەت تا ئەو خوشک و برا مانگرتووانە چیتر لەو سارد و سەرما و دڵەڕاوکێیەدا چەقبەستوو نەبن و بەتەندرووستی باشەوە بگەڕێنەوە ناوماڵ و خانەوادەکانیان و زانایانی ئاینی وەکیلیان بن لەبەردەم خوا و ئیمام بن بۆ ڕاستی و درووستی و بەدواداچوونی داواکانیان کەڕەوایەتی هەبێت.
