بەرپرسێکی وەزارەتی شارەوانی و گەشتوگوزار ئاشکرای دەکات، ڕەزامەندیی حكومەتی هەرێمی كوردستان بۆ 73 هەزار کارمەند و فەرمانبەری وەزارەتی ناوخۆ و وەزارەتی پێشمەرگە بۆ پێدانی زەوی دەرچووە.
سەربەست مەولوود، بەڕێوەبەری كاروباری یاسایی لە وەزارەتی شارەوانی و گەشتوگوزار، بە میدیای پارتی ڕاگەیاند: “ڕەزامەندیی ئەنجومەنی وەزیران بۆ پێدانی زەوی بە 64 هەزار کارمەندی وەزارەتی ناوخۆ گەڕاوەتەوە شارەوانی”.
ئەو بەرپرسە ئاشکراشی کرد: “ئەو 64 هەزار ناوە پۆلیس و زێرەڤانی و فەرمانبەرانی ناوخۆ دەگرێتەوە”.
سەربەست مەولوود وتیشتی: “ڕەزامەندیی ئەنجوومەنی وەزیران بۆ لیستی ناوی نۆ هەزار پێشمەرگە گەڕاوەتەوە وەزارەت”.
هەر فەرمانبەرێك، كە هەشت ساڵ خزمەتی هەبێت و هەر خانەنشینێكیش لە كاتی فەرمانبەریدا سوودمەند نەبووبێت، زەوییەكی 200 مەتری پێ دەدرێت.
سەربەست مەولوود، جەختی کردەوە، ناوی کارمەندانی ناوخۆ و پێشمەرگە لە وەزارەتی شارەوانی دەدرێتە شارەوانییەکان لە پارێزگاکان و ئیدارە سەربەخۆکان بۆ تەرخانکردنی زەوی، وتیشی: “بەپێی شوێنی نیشتەجێبوون و كارتی زانیاری، لیستەکان بۆ شارەوانییەكان ڕەوانە دەكەین، بۆ ئەوەی زەوییان بۆ تەرخان بكرێت”.
لە کۆتایی مانگی ڕابردوودا، لیستی ناوی نزیکەی 200 هەزار فەرمانبەری شارستانی و سەربازی لەلایەن ئەنجوومەنی وەزیران ڕەزامەندیی پێدانی زەوییان بۆ دەرچوو.
ڕۆژی 27ی ئازاری 2024، ئەنجوومەنی وەزیرانی هەرێمی کوردستان بڕیاری دا بە پێدانی زەوی بەو فەرمانبەرانەی کە سوودمەند نەبوون و لە رۆژی 31ی ئایاری 2024، وەزارەتی شارەوانی ڕێنمایی ژمارە 2ی ساڵی 2024ی دابەشكردنی زەوی بەسەر فەرمانبەران لە رۆژنامەی وەقایعی فەرمیی كوردستان بڵاوكردەوە.
