کۆردیناسیۆنی یەکێتیی راگەیاندنی دیموکراتیک (یەرەدە) لە رۆژئاوای کوردستان دەڵێت، یەکێک لەو هاووڵاتییانەی لە بۆردوومانەکەی چوارقوڕنەدا گیانی لەدەستدا، رۆژنامەنووسێک بوو بەناوی عەزیز کۆیلوئۆغلو و لە باشوور و رۆژئاوای کوردستان کاری کردبوو.
ئەمڕۆ شەممە، کۆردیناسیۆنی یەکێتی ڕاگەیاندنی دیموکراتیک لە رۆژئاوای کوردستان لە ڕاگەیەندراوێکدا دەڵێت: لە هێرشەکەی تورکیادا لە سنووری چوارقوڕنە لە ئیدارەی راپەڕینی سەر بە پارێزگای سلێمانی، عەزیز کۆیلوئۆغلو گیانی لەدەستدا.
عەزیز کۆیلوئۆغلو لە ساڵی 1976 لە ئامەد لە باکووری کوردستان لەدایکبووە. یەرەدە لە راگەیەندراوەکەیدا دەڵێت: ئەو هاووڵاتییە “لە سەرەتای ساڵەکانی 2000دا لە راگەیاندنی ئازاددا جێگەی خۆی گرت و وەک پەیامنێر، کامێرامان، سەرنووسەر، بەڕێوەبەری هەواڵ و بەڕێوەبەری گشتی کاری کردووە.
ڕۆژی 27ی کانوونی دووەمی 2025، لە سنووری چوارقورنە لە ئیدارەی راپەڕین درۆنێک ئۆتۆمبێلێکی جۆری تۆیۆتا لاندگرۆزی بۆردوومان کرد، بەهۆیەوە چوار کەس گیانیان لەدەستدا.
ڕۆژی 5ی ئەم مانگە، کۆمیتەی خانەوادەی شەهیدانی باکوور و رۆژهەڵاتی سووریا ناسنامەی دوو کەس لەوانی ئاشکرا کرد کە لە رووداوەکەدا گیانیان لەدەستدابوو.
بەگوێرەی راگەیەندراوی کۆمیتەکە، هێڤا عەرەبۆ، ئەندامی کۆردیناسیۆنی کۆنگرەی ستار و دلاوەر عەبدولقادر عەرەبۆ، ئەندامی پارتی یەکێتی دیموکرات (پەیەدە) لە بۆردوومانەکەدا گیانیان لەدەستداوە.
کۆمیتەی خانەوادەی شەهیدانی باکوور و رۆژهەڵاتی سووریا ئاماژەی بەوەشکرد، دلاوەر عەبدولقادر عەرەبۆ لەدایکبووی ساڵی 1990ـی رۆژئاوای کوردستان و هێڤا عەرەبۆش لەدایکبووی 1981ـی هەمان پارچەی کوردستان بوو.
