سەرۆک کۆماری تورکیا بەڵێنی بنیادنانی “ئیستانبوڵێکی نوێ و تورکیایەکی نوێ” دەدات لە دوای ساڵی 2028.
ئەمڕۆ هەینی، ڕەجەب تەیب ئەردۆغان، سەرۆک کۆماری تورکیا و سەرۆکی گشتی پارتی داد و گەشەپێدان لە میانی بەشداری کردنی لە هەشتەمین کۆنگرەی ئاسایی پارتەکەی ئیستانبوڵ وتارێکی پێشکەش کرد تێیدا ڕەخنەی لە ئۆپۆزسیۆنی وڵاتەکەی گرت و، ڕایگەیاند: “ئەمانە وادەزانن سیاسەت کردن و مشتومڕی توند هەمان شتە. هەموو کرمۆکەیەک نابێتە پەپوولە. لە قۆزاغەی ئەمانەدا سیاسەتمەدارێک دەرناچێت خزمەت بە وڵات بکات”.
لە بارەی کارەکانیان لە ناوچەی بوومەلەرزە، سەرکۆمار ئەردۆغان ڕایگەیاند: “هەتا ئەمڕۆ تیروپشکمان بۆ 201 هەزار و 580یەکەی نیشتەجێبوون و دووکان کردووە و، کلیلمان ڕادەستی خاوەنە شایستەکانیان کردووە”.
وتیشی: ”لەگەڵ تەواوبوونی 252 هەزار یەکەی نیشتەجێبووندا هەوڵی بەخێرایی تەواوکردنی دووکانەکانیش دەدەین. هەتا سەری ساڵ دروستکردنی 453 هەزار یەکەی نیشتەجێبوون و دووکان تەواو دەکەین”.
ئەردۆغان بەڵێنیشیدا لە دوای ساڵی 2028ەوە کە بڕیارە هەڵبژاردنی سەرۆکایەتی و پەرلەمانیی تێدا بکرێت، “ئیستانبوڵێکی نوێ و تورکیایەکی نوێ” بنیاد بنێن.
پێشتریش ئەردۆغان لە لێدوانێکیدا ئاماژەی دا بەوەی بەنیازە خۆی بۆ خوولێکی نوێی سەرۆکایەتی تورکیا کاندید بکاتەوە.
