پەکەکە مەرجی بۆ چەک دانان هەیە

ئەندامی کۆمیتەی بەڕێوەبەری پارتی کرێکارانی کوردستان مەرجی دانانی چەک لەلایەن پەکەکەوە ئاشکرا دەکات و دەڵێت”هەڵوێستی تورکیا لەبارەی پرۆسەکەوە ڕوون نییە”.

موراد قەرەیلان، ئەندامی کۆمیتەی بەڕێوەبەری پارتی کرێکارانی کوردستان “پەکەکە” لە دیمانەیەکیدا لەگەڵ میدیاى نزیک پەکەکە ڕایگەیاند، هەوڵی ڕابەری کورد ئۆجەلان لەئاستێکدایە دەیەوێت 15ـی شوباتی ئەمساڵ کە ڕۆژێکی ڕەشە بگۆڕیت بۆ ڕۆژی چارەسە و ئێمە جاوەڕوانی بانگەوازین لەو ڕۆژەدا چونکە بۆ ئێمە چارەنوسسازە.

ئاماژەی بەوەشدا، ئێستا لە پێشتر زیاتر بژاردەمان لەبەردەستە، دەوڵەتی تورک زۆر هەوڵیدا ئێمە تەسفییە بکات و پێگە و هێزی خۆمان پاراست، ئێمە تەنها ڕێکخستنی شوێنێک نین، یان وەک وڵاتێک نین، ئەمڕۆ ئێمە لەسەر ئاستی هەرێمەکە ڕێکخستنین، یانی ئێمە ڕێکخستنێکی هەرێمین، بۆ ئەمەش بژاردەی زیاترمان لەبەر دەستە، ئەوانەی پێشتر لێمان دوور دەکەوتنەوە، ئەمڕۆ دەیانەوێت پەیوەندیمان پێوە بکەن و دەرفەت بخوڵقێنن، بە واتایەکی تر ئێستا دەرفەتەکانمان لە ڕووی سیاسی و دیپلۆماتیکەوە بەهێزترە، ئێمە نامانەوێت زۆر گەورەی بکەین، چونکە ئێمە ڕێبازی خۆمان هەیە و پاڵ بە دەرەوە نادەین، بەڵام ئەمەش دەرفەتێکە، لەسەر هەرێمەکە هێزی ستراتیژی و کەسانێکە تێدەکۆشن هەیە، لەم چوارچێوەیەشدا ئێمەش لایەنێکین، دەرفەتە سیاسییەکان زیادتر بووە.

لەبارەی چەکدانانی پەکەکە، قەرەیلان ڕوونیکردەوە، ئێمە بزووتنەوەیەکین هەزاران چەکدارمان هەیە، ئەو هێزە بۆ پارە نەهاتووەتە شاخ، تاوەکو پارەکەی بڕدرا بچێتەوە ماڵەوە، ئەو هێزە گیانبەختکەر و ئایدۆلۆجییە، ئەگەر ئۆجەلان بە بەردەوامیی لەگەڵ هێزەکەماندا گفتوگۆ نەکات، چۆن دەکرێت هێزەکەی قایل بە چەکدانان بکات، جگە لە ئۆجەلان هیچ کەسێک ناتوانێت داوای چەکدانانمان لێبکات و هێزەکەمان بەو داواکارییە قایل بکات”.

دەشڵێت، “بۆ ئەوەی ئەوە رووبدات سەرەتا پێویستە ئۆجەلان ئازاد بکرێت. یان پێویستە ئۆجەلان بەشێوەیەکی ئازاد قسە لەگەڵ پەکەکە بکات، ئەو قسەکردنە بە رێگەی تەکنیکی بێت یان چاوپێکەوتنی شاند یان هەر رێگەیەکی دیکە.”

وتیشی” وەک سەرەتایەک پێویستە ئاگربەستی دوولایەنە رابگەیەندرێت، ئەگەر ئاگربەست رانەگەیەندرێت ئێمە چۆن باس لە چەکدانان بکەین، واتە دەبێت سەرەتا زەمینەسازیی بۆ بکرێت، و لە قۆناغی دواتردا زمانی قسەکردن بگۆڕدرێت بۆ زمانی ئاشتی و ئەو کاتە داواکارییەکان بەجێدەگەیەندرێن. ئێمە شەیدای چەک نین و ئەگەر ئازادی، یەکسانیی و دیموکراسیی بهێنرێتە ئاراوە، چەک مانای نامێنێت، ئەگەر نا هیچ پرۆسەیەک لەژێر گۆشەگیریی، فشار و هەڕەشەدا روونادات.”