ئەنجوومەنی سەرتاسەری مامۆستایان و فەرمانبەرانی ناڕازی دەچنە هەولێر و دەڵێن”ئەمڕۆ لە سلێمانی خۆپیشاندان بۆ پاڵپشتی مانگرتووان دەکەین”.
لەبەیاننامەیەکدا، ئەنجوومەنی سەرتاسەری مامۆستایان و فەرمانبەرانی ناڕازی ڕایانگەیاند، ماوەی 10 ساڵە، بەهۆی ئەو هەموو ستەم و برسیکردن و بێباکییەی دەسەڵاتدارانی هەرێمى کوردستان، بەرامبەر سەرجەم مووچەخۆران و چین و توێژەکان پەیڕەوی دەکات پەنایان بردووەتە بەر بایکۆتی ناچاری دەوام و بە گەرما و سەرما و بەفر و باران هاتونەتەسەر شەقام بۆ داواکردنی ماف و شایستەکانیان، و دوایان هەوڵیشیان لە سلێمانییە کە 13 هاوڕێیان بۆ جێبەجیکردنی داواکارییەکانایان و ماف و شایستەکانیان مانیان لە خواردن و خواردنەوە گرتووە.
ئاماژەی بەوەشدەکەن، بۆ پشتیوانی لە هاوڕێ مانگرتووەکانیان رۆژى یەکشەممە 9ـى شوباتى 2025، بەرەو هەولێر بەڕێبکەون، تا دەسەڵات لەنزیکەوە دەنگ و ناڕەزایەتییەکانیان ببیستێت.
هاوکات هەرئەمڕۆ بڕیارە بۆ پشتیوانی مانگرتووان لە پارکی مەلیک مەحمود گردبوونەوەی جەماوەری گەورە بەڕێوەبچێت و بەڕێپێوان بەرەو خێمەی مانگرتووان بڕۆن.
ماوەى 11 رۆژە مانگرتنى ژمارەیەک لە مامۆستایان و فەرمانبەران، بەرامبەر ئۆفیسی نەتەوەیەکگرتووەکان لە سلێمانی، بەردەوامە و تاوەکو ئێستا حکومەتى هەرێمى کوردستان وەڵامى داواکارییەکانیانی نەداوەتەوە.
