ئەمڕۆ نرخی مریشک لە سلێمانی بەرزبۆوە و نازم عەبدوڵا دەڵێت””تێچووی بەخێوکردنی مریشک بەشێوەیەکی بەرچاو زیادیکردووە”.
نازم عەبدوڵا، سەرۆکی کۆمەڵەی بەخێوکەرانی پەلەوەر لە سلێمانی، بە خەڵک-ی ڕاگەیاند، هۆکارەکانی پشت ئەم زیادبوونە ئاشکرایە چونکە تێچووی بەخێوکردنی مریشک بەشێوەیەکی بەرچاو زیادیکردووە، هاوکات هیچ پاڵپشتییەک نییە بۆ خاوەن کیڵگەکان، ئەمەش وایکردووە نرخی مریشک لە بازاڕە ناوخۆییەکان بگاتە ئاستێکی پێوانەیی، ئەمەش بارگرانی لەسەر هاوڵاتیان و بەخێوکەران بەهەمان شێوە دروستکردووە بەو پێیەی تێچووی بەرهەمهێنانی یەک کیلۆ لەنێوان دوو هەزار و 500 بۆ دوو هەزار و 800 دیناردایە، هەروەها نرخی هێلکەیەک بۆ 6 هەزار دینار بەرزبووەتەوە، هاوکات ئەمڕۆ نرخی مریشک لە سلێمانی گەیشتە سێ هەزار و 100 دینار بۆ هەر کیلۆیەک.
ئاماژەی بەوەشکرد، لە ماوەی هەشت مانگی ڕابردوودا زیانی گەورە بەر جوتیارانی پەلەوەردا کەوت، بەجۆرێک جوتیاران نزیکەی 50 بۆ 150 ملیۆن دینار بۆ هەر جووتیارێک زیانیان کردووە.
جەختیشیکردەوە، ئەو زیانانە دەگەڕێتەوە بۆ نەبوونی پاڵپشتی حکومەت کە بۆ ئەو کەرتە پێشکەش دەکرێت، ئەمە جگە لە داخستنی شوێنە بازرگانییەکان، جا چ لەسەر ئاستی پارێزگاکان بێت یان لەگەڵ باقی پارێزگاکانی عێراق.
لە سلێمانی یەکێکە لە پایە سەرەکییەکانی کەرتی کشتوکاڵ بەخێوکردنی مریشک و پەلەوەرە، هاوکاتو ڕۆڵی گرنگی هەیە لە گەیشتن بە ئاسایشی خۆراکی ناوخۆیی. بەڵام ئەم کەرتە ڕووبەڕووی ئاستەنگە بەردەوامەکان دەبێتەوە، دیارترینیان تێچووی بەرزی بەرهەمهێنان، کەمی پشتیوانی حکومەت و داخستنی شوێنە بازرگانییەکان، ئەمەش ڕووبەڕووی مەترسییە بەردەوامەکان دەبێتەوە کە هەڕەشە لە بەردەوامبوونی دەکات.
