“ترەمپ پێیوایە میسر و ئەردەن وەرگرتنی دانیشتووانی غەززە قبوڵ دەکەن”

ئیدارەی ئەمریکا جەخت لە کۆنترۆڵکردنی کەرتی غەززە دەکاتەوە و کۆشکی سپیش ڕایگەیاند ترەمپ پێیوایە میسر و ئەردەن پێشوازی لە فەڵەستینییەکان دەکەن.

ئەمشەو کارولاین لیڤیت، وتەبێژی کۆشکی سپی ڕایگەیاند، دۆناڵد ترەمپ، سەرۆکی ویلایەتە یەکگرتووەکان پێیوایە میسر و ئەردەن بە شێوەیەکی کاتیی پێشوازی لە فەڵەستینییەکان دەکەن تا ئەو کاتەی نیشتمانەکەیان بۆ بنیاد دەنرێتەوە، کە مەبەستی لە کەرتی غەززە بوو.

وتەبێژەکە ڕەتیشیکردەوە کە ئەمریکا پارە بۆ ئاوەدانکردنەوەی غەززە تەرخان بکات، بەڵکو ڕایگەیاند کە ترەمپ ئامادەیە لەگەڵ گەلانی ئاشتیخوازی ناوچەکە کەرتی غەززە بنیادبنێتەوە.

دوێنێ ترەمپ لە میانی پێشوازیکردنی لە بنیامین ناتانیاهو، سەرۆک وەزیرانی ئیسرائیل لە کۆشکی سپی ڕایگەیاند کە دەیانەوێت دەست بەسەر غەززەدا بگرن و دانیشتووانەکەی بگوێزنەوە.

لایخۆشیەوە مارکۆ رۆبیۆ، وەزیری دەرەوەی ئەمریکا لەبارەی داواکەی ترەمپ ڕایگەیاند، داواکە زۆر هەنگاوێکی بەخشندانەیە و دەیەوێت بەرپرسیارییەتی دووبارە بنیادنانەوەی غەززە بگرێتە ئەستۆ.