شەوی بەرات دەكاتە شەوی 15ی شەعبان (نیوەی مانگی شەعبان) كە تەنها نزیكەی 15 ڕۆژێكی دەمێنێت بۆ مانگی ڕەمەزانی پیرۆز و ئەو شەو و ڕۆژەش چەند فەرموودەیەكی پێغەمبەری ئیسلام محەمەد (د.خ)ی لەسەرە و لە هەرێمی كوردستانیش وەكو جەژنێك سەیری دەكرێت و نوقڵ و شیرینی دەبەخشرێتەوە.
نەبەز ئیسماعیل، وتەبێژی وەزارەتی ئەوقافی هەرێم بۆ (خەڵك) ڕایگەیاند، یەكەم ڕۆژی مانگی شەعبان لە ڕۆژی هەینی 31- 1-2025 دەستی پێكردووە.
دیوانی وه‌قفی سوننی له عێراق لە بەیاننامەیەكدا ئاماژەی بەوەكردووە، ڕۆژی هه‌ینی كه هاوتایه له‌گه‌ڵ (31ی كانونی دووەمی 2025) یه‌كه‌م ڕۆژی مانگی شه‌عبانی ساڵی 1446ی كۆچی بوو.
بەپێی دیاری كردنی یەكەم ڕۆژی مانگی شەعبان، شەوی پێنج شەممە لەسەر هەینی (13 لەسەر 14ی شوبات)، دەبێتە شەوی ١٥ی شەعبان و شەوی بەراتە و ڕۆژی هەینی كە 15ی شەعبانە بەڕۆژووبوون تیایدا سوننەتە.
شەوی بەرات منداڵان بە ماڵاندا دەگەڕێن بۆ كۆكردنەوەی نوقڵ و شیرینی و لە ئێستاشەوە بازاڕەكان پڕبوون لە نوقڵ و شیرینی بەو بۆنەیەوە، ڕۆژی دواتریش، كە 15ی شەعبان دەكات زۆرینەی موسڵمانان بەڕۆژوو دەبن.
