وه‌زاره‌تی كاره‌بای حكومه‌تی هه‌رێم ئاشكرای دەكات، (پڕۆژه‌ی ڕووناكی) كه بریتیه له دابینكردنی كاره‌بای 24 كاتژمێری بۆ 8 گه‌ڕه‌كی دیكه‌ی پارێزگای هه‌ولێر جێبه‌جێ ده‌كرێت و بڕیاریشه به‌مزووانه له دهۆك و سلێمانیش ئه‌و پڕۆژه‌یه بخرێته بواری جێبه‌جێكردنه‌وه.
وه‌زاره‌تی كاره‌بای هه‌رێم له‌ڕاگه‌یه‌ندراوێكدا ئاماژەی بەوەكردووە، “له چوارچێوه‌ی هه‌وڵه‌كانی حكومه‌تی هه‌رێمی كوردستان بۆ دابینكردنی كاره‌بای 24 كاتژمێری، وه‌زاره‌تی كاره‌با له ڕێگای پڕۆژه‌ی ڕوناكییه‌وه كاره‌بای نیشتیمانی 24 كاتژمێری بۆ 8 گه‌ڕه‌كی دیكه‌ی شاری هه‌ولێر دابین ده‌كات”.
گەڕەكەكان بریتین له (كوڕان، ڕزگاری، كوردستان، به‌هار، كرێكاران، ئازادی، ماجیداوه و ڕاستی) و زیاتر له 28 هه‌زار هاوبه‌شی كاره‌بای له‌خۆگرتووه.
ئاماژه‌ی به‌وه‌شكردوه، “پێشتر گه‌ڕه‌كه‌كانی (شادی و به‌هاری نوێ و نازناز و به‌ختیاری و سه‌ربه‌ستی) به 22 هه‌زار هاوبه‌شه‌وه كرابونه 24 كاتژمێری و به‌مشێوه‌یه به‌كۆی گشتی 50 هه‌زار هاوبه‌ش له‌م خزمه‌تگوزارییه سوودمه‌ند ده‌بن”.
وه‌زاره‌تی كاره‌با ڕوونیشی كردۆتەوە، “هاوته‌ریب له‌گه‌ڵ شاری هه‌ولێر، كاره ته‌كنیكییه‌كان له هه‌ردوو پارێزگای سلێمانی و دهۆك ده‌ستیان پێكردوه، له‌چه‌ند هه‌فته‌ی داهاتوودا چه‌ند گه‌ڕه‌كێك له‌و پارێزگایانه‌ش ده‌كرێن به كاره‌بای 24 كاتژمێری”.
