قائیمقامیەتی هەولێر لەپێناو كەم كردنەوەی پارەی كارەبای مۆلیدەی هاوولاتیان، بڕیاریدا بە كوژاندنەوەی مۆلیدە ئەهلییەكان لەكاتی نیوەشەو تاكو بەیانی.
نەبەز عەبدولحەمید، قائیمقامی قەزای ناوەندی هەولێر ڕایگەیاندووە، ” بڕیاردرا خشتەی مۆلیدە ئەهلییەكان گۆڕانکاری بەسەردابێت، لە کاتژمێر 2ی شەو تا 6ی بەیانی مۆلیدەکان دەکوژێنەوە.”
سەبارەت بە هۆكاری بڕیارەكە ڕاشیگەیاندووە، پەیوەندی بە داواكاریی زۆری خەڵکەوە هەیە و داوایان كردووە ئەو كاتانە مۆلیدە بكوژێتەوە.”
وتیشی، “بۆ ئەوەی پارەی زۆر لەسەر خەڵك نەوەستێت بڕیاردرا چوار كاتژمێر پێدانی كارەبای مۆلیدە ئەهلییەكان كەم بكرێتەوە و لەمشەوەوە بڕیارەكە جێبەجێ دەكرێت.”
ئەمە لەكاتێكدایە، كە مانگی 1ی ڕابردوو، کارکردنی مۆلیدە ئەهلییەکان گەیشتە سەرووی 240 كاتژمێر و بەوهۆیەشەوە نرخی یەک ئەمپێر كارەبای مۆلیدە لەنێوان 16 هەزار و 500 دینار بۆ 20 هەزار دینارە بوو.
