وتەبێژی حکومەتی هەرێمی کوردستان ڕایگەیاند، حکومەتی عێراق زیاتر لە 958 ملیار دیناری مووچەی مانگی یەکی خستە سەر هەژمارەی وەزارەتی دارایی و دەست بە دابەشکردنی مووچە دەکرێت.
ئەمڕۆ سێشەممە، پێشەوا هەورامانی، وتەبێژی حکومەتی هەرێمی کوردستان ڕایگەیاند، وەزارەتی دارایی حکومەتی فیدراڵ بە یەک گوژمە بڕی (958,012,332,759) مليار دیناری خستە سەر هەژماری وەزارەتی دارایی حکومەتی هەرێمی کوردستان
وتیشی: “لە زووترین کاتدا وەزارەتی دارایی دەست بە دابەشکردنی مووچەی مانگی یەک دەکات”.
ئەمەش دوای زنجیرە کۆبوونەوەکەی نێوان هەردوو شاندی وەزارەتی دارایی هەرێمی کوردستان و حکومەتی عێراق هات کە ماوەی چوار ڕۆژ لە بەغدا بەردەوام بوو.
دوێنێش ئاوات شێخ جەناب، وەزیری دارایی لە بەغداوە ڕایگەیاند، سەرجەم گرفتەکانی مووچەی 2025 چارەسەر کرا و هیچ گرفتێک بۆ مووچەی ئەمساڵ نەماوە.
