باڵیۆزخانەی ئەمریکا داوا لە حکومەتی عێراق دەکات لێپرسینەوە لە ئەنجامدەرانی هێرشەکەی سەر کێڵگەی کۆرمۆر بکات کە لە ڕێی درۆنێکی بۆمبڕێژکراوەوە ئەنجامدرا.
ئەمڕۆ سێشەممە، باڵیۆزخانەی ئەمریکا لە بەغدا ڕایگەیاند، هێرشەکەی سەر کێڵگەی غازی کۆرمۆر ئیدانە دەکەین. داواشی لە حکومەتی عێراق کرد لێپرسینەوە لەو کەسانە بکات کە بەرپرسیاربوون لە ئەنجامدانی هێرشەکە.
شەوی یەکشەممە، بەڕێوبەرایەتی گشتیی دژەتیرۆر ڕایگەیاند، “لە کاتژمێر 07:05ی ئێوارە هێرشێکی درۆنی (بۆمبڕێژکراو) ئاراستەی کێڵگەی غازی کۆرمۆر کرا، کە دەکەوێتە سنووری چەمچەماڵ. بەپێی زانیارییە هەواڵگرییەکان، درۆنەکە لە ناوچەی بەشیرەوە ئاراستە کراوە و لەلایەن گرووپە میلیشیا و یاساشکێنەکانەوە جێبەجێ کراوە”.
ڕاشیگەیاند، هێرشەکە هیچ زیانێکی گیانی و ماددی بەدواوە نەبوو و کێڵگەکە و کۆمپانیای دانەغاز بە تەواوی پارێزراون. دەزگا ئەمنییەکان دڵنیایی دەدەنە هاوڵاتیان کە بە وردی بەدواداچوون بۆ ئەم پێشێلکارییە دەکەن و هەر زانیارییەکی نوێ لەم بارەیەوە ڕادەگەیەنرێت”.
دوابەدوای ئەوەش شانەی ڕاگەیاندنی ئەمنی سەر بە وەزارەتی ناوخۆی عێراق بڵاویکردەوە کە محەمەد شیاع سوودانی، فەرماندەی گشتی هێزە چەکدارەکان فەرمانی کرد کە لیژنەیەکی تەکنیکی ئەمنی بۆ لێکۆڵینەوە لە هێرشەکەی سەر کێڵگەی کۆرمۆر پێکبهێندرێت.
ڕوونیشیکردەوە کە فەرماندەیی ئۆپەراسیۆنە هاوبەشەکان بەردەوام بوو لە پەیوەندی و ڕێنماییکردن بە فەرماندە مەیدانییەکانی پێشمەرگە لە سلێمانی و دەوروبەری بۆ زانینی وردەکارییەکانی ڕووداوەکە و ڕاشیگەیاند کە هەر هەوڵێک بۆ تێکدانی ئابوری وڵات و زیانگەیاندن بە بژێوی و بەرژەوەندی خەڵک هەوڵێکە هەموو عێراقییەکان دەکاتە ئامانج، بۆیە هێزە ئەمنییەکان ڕێگە بەم کارە نادەن و تۆڵە لە هەر کەسێک دەکەنەوە کە پێی وابێت ئاسایشی ئابووری وڵات تێکبدات.
