پارێزگاری سلێمانی پشتیوانی بۆ مانگرتووان دووپاتکردەوە و دەڵێت”مامۆستایانی مانگرتوو عاملی خێربوون بۆ چارەسەری گرفتە داراییەکانی هەرێم و بەغدا”.
هەڤاڵ ئەبوبەکر، پارێزگاری سلێمانی ڕایگەیاند، مامۆستایانای مانگرتوو پەیامی خەباتی مەدەنییان بۆ مافەکانیان گەیاندە حکومەتی هەرێم و عێراق و جیهان، لەڕێگەی نەتەوەیەکگرتووەکانەوە دەنگی بڵندیان گەیشتووە.
ئاماژەی بەوەشدا، جگە لە پشتیوانی خۆمان بۆ ئەم بەڕێزانە خەڵکی کوردستان و سلێمانی پشتیوانی مانگرتووانیان کرد، و کۆی دام و دەزگاکانمان لەخەمی مانگرتووانان و پشتیوانیان دەکەن کە هەڵگری خەمی میللەتەکەمانن.
وتیشی، ڕۆڵی ئەمان لە خەباتی مەدەنی پاڵنەربووە بۆئەوەی حکومەتی ئیتیحادی بۆ چارەسەری کێشەکان بێتە پێشەوە، هەروەک چۆن حکومەتی هەرێمیش بەرەو چارەسەری زووی گرفتەکان هەنگاوی ناوە، و ئەمڕۆش دەرکەوت وەزیری دارایی هەردوو حکومەتی هەرێم و ناوەند جەختیان لەسەر داوا ڕەواکانی مووچەخۆران و مامۆستایان و خەڵک و شایستەکانیان دەربریوە.
هەڤاڵ ئەبوبەکر ڕاشیگەیاند، ئێمە پەیامی فەرمی بەڕێز دکتۆر غوڵام ئیسحاقزایی جێگری نوێنەری تایبەتی سکرتێری گشتیی نەتەوە یەکگرتووەکان لە عیراقمان پێگەیاندن، کە بەڕێزیان لە بری نەتەوە یەکگرتووەکان و هەموو ئاژانسەکانی نەتەوە یەکگرتووەکان لە عیراق، سوپاسی شێوازیی مەدەنیانەو پەیامی ئاشتیانەی مانگرتووەکان و پشتیوانەکانیان دەکەن، و یاداشتی مانگرتووە بەڕێزەکانیان گەیاندۆتە هەردوو حکومەتی فیدراڵیی و هەرێمی کوردستان بە ئومێدی چارەسەرکردنی ڕیشەیی داواکارییەکانیان.
هەڤاڵ ئەبوبەکر ڕاشیگەیاند، ئێمە پێمانوایە لەسەر ئاستی فەرمی و میلیی و لۆکاڵی و خۆجێی و نەتەوەیەکگرتووەکان پشتیوانی تەواوی داواکانی مامۆستایانی مانگرتوو و مووچەخۆرانیان کردووە و سوپاسیان دەکەین کە عاملی خێری چارەسەری ئەم گرفتانەی نێوان عێراق و هەرێم بوون.
لەبارەی شکاندنی مانگرتنەوە، پاریزگاری سلێمانی ڕایگەیاند، هەڵبژاردنی ئەم شوێنە پەنابردنە بۆ شەرعیترین دامەزراوەی جیهانی کەنەتەوەیەکگرتووەکانە بۆ چارەسەری گرفتەکانی نێوان هەرێم و بەغدا، نیشاندەری ئەوەیە کە خەباتی ئەمان خەباتێکە بۆ میللەتێک،ئەوان خۆیان دەستپێشخەر بوون لەم خەباتە و تەنها خۆیان دەبێت بڕیار لە کۆتاییهاتنی ئەم مانگرتنە بێنن، ئەوان لەهەرکەسێکی تری ئەم میللەتە گرنگترن بۆمان، ئێمە مافی ئەوەمان نییە کات و شوێنی شکاندنی مانگرتنیان دیاریبکەین، چۆن بریاری چارەسەری گرفتەکان گرنگە لەوان گرنگتر تەندروستی ئەمان و شکاندنی مانگرتن و کرانەوەی دەرگای قوتابخانەکانە.
