وتەبێژی حکومەتی هەرێم لەبارەی ڕێککەوتنی هەولێر و بەغدا زانیاری ئاشکراکرد و دەڵێت”ساڵی 2025 ڕیککەوتنەکە بۆ مووچەی هەر 12 مانگەکەیە”.
پێشەوا هەورامانی، وتەبێژی حکومەتی هەرێم بەمیدیای پارتی ڕاگەیاند، ڕێککەوتنێکی باش لەنێوان حکومەتی هەرێم و بەغدا ئەنجام درا و دەستخۆشی لە تیمی هەرێم دەکەین هەوڵەکانیان بۆ چارەسەری مووچە ئەنجامی باشیان هەبوو.
ئاماژەی بەوەشدا، بەپێی ئەو ڕێککەوتنەی لەسەر مووچە کراوە بۆ 12 مانگە و چیتر باسی گرفتی تەکنیکی ناکرێت و سەرجەمیان چارەسەر کراوە، ئەمەش بەنیازباشی هەردوولا بووە کە نیازی چاکسازی و چارەسەری گرفتەکانیان هەبووە.
وتیشی، گەرەنتیەک هەیە حکومەتی هەرێم هیچ کەموکوڕییەکی نییە، بەڵگەش ئەو ڕێککەوتنەی ئەمرۆ بووە و ئەو داواکاریانەی هەبووە جێبەجیمان کردووە گەر وانەبوایە ڕیککەوتن نەدەکرا و کۆبوونەوەکان بە لایەکی تردا دەڕۆشتن.
پێشەوا هەورامانی وتیشی، مووچەی مانگی یەک بڕیاربوو ئەمڕۆ بنێردرێت، و بڕیارە لەم هەفتەیە پارەکە بنێردرێت، بۆ لەمەولا وەک هەموو ناوچەکانی عێراق مانگانە مووچەی هەرێم دەدرێت، و ئەو لیستەی دراوە جێگیرکراوە.
لەبارەی خانەنشینانەوە وتەبێژی حکومەتی هەرێم ڕایگەیاند، خانەنشین و پلەبەرزکردنەوە گفتوگۆی زۆر لەسەر کراوە و گۆڕانکاری لە مووچەکان ڕوودەدات، و ڕۆژی چوارشەممە کۆبوونەوەی ئەنجوومەنی وەزیران دەبێت و زیاتر وردەکاری دەخرێتەروو، و هاوکات ئەگەر پارەکە ئەگەر بەگشتی بێت ڕاستەوخۆ دابەشدەکرێت.
