ئەنجومەنی سەرتاسەری مامۆستایان و فەرمانبەرانی ناڕازی پەیامێکی لە بارەی خۆپیشاندانە بەرفراوانەکەی ئەمڕۆی پارێزگای سلێمانی بڵاوکردەوە و ڕایگەیاند، هەر لایەنێک دەستشکانەوە لەگەڵ ئیرادە و بازووی هێزمان بکات سەرەنجام دەشکێتەوە و بەچۆکدا دێت.
ئەمڕۆ دووشەممە، ئەنجومەنی سەرتاسەریی مامۆستایان و فەرمانبەرانی ناڕازیی خۆپیشاندانێکی گەورە و بەرفراوانیان بۆ پشتیوانی لە مامۆستایان و فەرمانبەرانی مانگرتوو ئەنجام دا.
هاوکات دوای تەواوبوونی خۆپیشاندانەکە، ئەنجومەنی سەرتاسەری مامۆستایان و فەرمانبەرانی ناڕازی پەیامێکی بڵاوکردەوە و ڕایگەیاند: پڕبەدڵ سوپاسی بەدەمەوەهاتنی بەرفراوان و هەڵوێستی مەردانە و بوێرانەی هاووڵاتییان و چین و توێژەکان دەکەین دەستی پێزانین و وەفاداری بەسنگەوە دەگرین بۆتان؛ کە بەدەنگ بانگەوازەکەمانەوە هاتن و بەگوڕوتینەوە بەشداری خۆپیشاندان و ڕێپێوانی جەماوەری ئەمڕۆتان کرد.
دەشڵێت: سەلماندتان؛ ئیرادەی پۆڵایینی ئێوە، گرەوی لەسەر ناکرێت و هەر لایەنێک دەستشکانەوە لەگەڵ ئیرادە و بازووی هێزمان بکات؛ سەرەنجام دەشکێتەوە و بەچۆکدا یەت.
