قەدەغەی هاتووچۆ لە دوو گەڕەکی دێرلزۆر ڕاگەیەندرا و هاوکات لەگەڵ دەستگیرکردنی سەرکردەیەکی داعشیشدا، هاوپەیمانان بەردەوامن لە مەشقی سەربازیی.
ئەمڕۆ دووشەممە، ئاسایشی گشتی حکومەتی ڕاگوزەری سووریا ڕایگەیاند بەمەبەستی دەستگیرکردنی پاشماوەکانی بەعس، تا نیوەڕۆی ئەمڕۆ هاتووچۆ لە هەردوو گەڕەکی جبورە و توب جبورەی شاری دێرلزۆر قەدەغەکراوە.
لە لایەکی دیکەشەوە هێزەکانی هاوپەیمانان لە شارۆچکەی نەملیەی ڕیفی دێرلزۆر ئۆپەراسیۆنێکیان لە دژی ڕێکخراوی تیرۆریستی داعش ئەنجامدا و لە ئاکامدا سەرکردەیەکی داعش بە ناوی عەبد عەواد عاسی دەستگیرکرا.
هەر لە دێرلزۆر مەشقی هێزەکانی هاوپەیمانان بەردەوامە و دوێنێ شەویش لە کێڵگەی نەوتی کۆنیکۆ مەشقی سەربازییان کرد، ئەویش دوای ئەوەی مەشقێکی هاوشێوەیان لەکێڵگەی نەوتی عومەر ئەنجامدا.
سەرچاوەکانی ڕۆژئاوای کوردستان بڵاویانکردەوە کە هاوپەیمانان لە کاتی مەشقەکاندا چەکی قورسیان بەکارهێناوە، بێ ئەوەی ئامانجەکەی ئاشکرا بکرێت.
