فەرماندەی گشتی هیزەکانی سووریای دیموکرات ڕایگەیاند کوردانی سووریا حکومەت و پەرلەمانی سەربەخۆیان ناوێت و تەنیا خوازیارن لە چوارچێوەی دەوڵەتێکی لامەرکەزیدا کاروبارەکانیان بەڕێوەببەن.
مەزڵوم عەبدی، فەرماندەی گشتیی هێزەکانی سووریای دیموکرات لە چاوپێکەوتنێکیدا لەگەڵ میدیای ئەمریکا ڕایگەیاند، لەم دواییانەدا چاوی بە ئەحمەد شەرع، سەرۆک کۆماری سووریا بۆ قۆناغی ڕاگوزەر کەوتووە و هەردوولا هەوڵی دۆزینەوەی چارەسەر بۆ داهاتووی سووریا و لە نێویشیاندا دۆخی کورد دەدەن.
باسی لەوەشکرد کە سەردانی بەرپرسانی هەسەدە بۆ دیمەشق بەردەوام دەبێت لەپێناو گەیشتن بە لێکتێگەیشتن لەگەڵ دەسەڵاتدارە نوێیەکان.
فەرماندەی هەسەدە دەڵێت، “ئەندامانی هاوپەیمانیی نێودەوڵەتیی دژی داعش وەک ئەمریکا، بەریتانیا و فەڕەنسا نێوەندگیری بۆ هەسەدە و دەسەڵاتدارانی دیمەشق دەکەن و ئێمە دەمانەوێت سووریا دەوڵەتێکی یەکپارچە بێت و خاوەنی حکومەتێکی ناوەندی بێت لە دیمەشق.”
عەبدی ئەوەشی خستەڕوو کە کوردانی سووریا نایانەوێت لە وڵاتەکە جیاببنەوە یاخود هاوشێوەی هەرێمی کوردستان حکومەت و پەرلەمانی سەربەخۆ دابمەزرێنن، گەلی باکوور و ڕۆژهەڵاتی سووریا دەیەوێت کاروبارە ناوخۆییەکانی خۆی لە دەوڵەتێکی لامەرکەزی بەڕێوەببات و دەشڵێت، “سووریا عێراق نییە و عێراقیش سووریا نییە، هەروەها باکوور و ڕۆژهەڵاتی سووریا هەرێمی کوردستان نییە.”
لەبارەی هەڵوەشاندنەوەی هەسەدە مەزڵوم عەبدی ئاماژە بەوە دەکات، “دەمانەوێت هەسەدە ببێتە بەشێک لە وەزارەتی بەرگری و بەشێکی ستراتیجی بەرگریی سووریا، لەوبارەیەشەوە پێشنیازێکمان ئاڕاستەی دیمەشق کردووە و چاوەڕێی وەڵامین.”
سەبارەت بەو کۆبوونەوەیەی کە هەفتەی ڕابردوو لە دیمەشق ئەنجامدرا و تێیدا ئەحمەد شەرع بە سەرۆک کۆماری سووریا بۆ قۆناغی ڕاگوزەر هەڵبژێردرا، مەزڵوم عەبدی وتی، “ئێمە لەو کۆبوونەوەیە ئامادەنەبووین و لێدوانیشی لەسەر نادەین”.
