هاوکات لەگەڵ بەردەوامبوونی مانگرتندا، ئەنجومەنی سەرتاسەریی مامۆستایان و فەرمانبەرانی ناڕازیی لە دژی دواکەوتنی مووچە و بۆ جێبەجێکردنی تەوتین خۆپیشاندان دەکەن.
ئەمڕۆ دووشەممە، مانگرتنی مامۆستایان و فەرمانبەران لە سلێمانی پێی نایە هەفتەیەکەوە و تا ئێستا داواکارییەکانیان سەبارەت بە خەرجکردنی مووچە و تەوتین جێبەجێ نەکراوە.
لە لایەکی دیکەشەوە بڕیارە ئەمڕۆ ئەنجومەنی سەرتاسەریی مامۆستایان و فەرمانبەرانی ناڕازیی “خۆپیشاندانێکی گەورە و بەرفراوان” بۆ پشتیوانی لە مانگرتووەکانمان ئەنجام بدەن.
ئەنجومەنەکە داوای لە هاووڵاتییان و هەموو چین و توێژەکان کرد بەشداری فراوان لە خۆپیشاندانەکەدا بکەن کە کاتژمێر 10:30ی خولەی ئەم بەیانییە لە بەردەم پارکی مەلیک مەحمودەوە دەستپێدەکات و لە ڕاگەیەندراوەکەیاندا هاتووە: “داوا لە سەرجەم مامۆستایان و فەرمانبەران و چین و توێژە جیاوازەکان و هاووڵاتیانی ویژدان زیندوو و بەهەڵوێستی سەرجەم شار و شارۆچکەکان دەکەین ئامادەبن”.
ئەم چالاکییانەش هاوکاتن لەگەڵ بەردەوامبوونی کۆبوونەوەکانی شاندی وەزارەتی دارایی هەرێمی کوردستان و عێراق لە بەغدا بۆ چارەسەرکردنی کێشە داراییەکانی نێوانیان.
