ئەمڕۆ پەرلەمانی عێراق هەمواری یاسای بودجەی فیدڕاڵی پەسەند كرد، كە تیایدا پارەی تێچووی هەناردەی بەرمیلێك نەوتی هەرێم كرا بە 16 دۆلار و لەڕێگەی سۆمۆوە دەست بە هەناردەكردنەوەی نەوتی كوردستان دەكرێت، كاندیدێكی دەرچوووی پەرلەمانیش دەڵێت: لە پاڵ بڕیاری دادگای فیدڕاڵی بۆ مووچە، پاڵپشتییەکی تر بۆ مسۆگەری مووچەی مووچەخۆرانی کوردستان دروست دەبێت.
عومەر گوڵپی، ئەندامی دەرچووی پەرلەمانی كوردستان لە پشكی كۆمەڵی دادگەری، كە تا ئێستا سوێندی یاسایی بۆ بوون بە پەرلەمانتار نەخواردووە بەهۆی ڕەتكردنەوەی ئەنجامی هەڵبژاردن لەلایەن حزبەكەیەوە بۆ (خەڵك) ڕایگەیاند، ئەمڕۆ لە کۆبوونەوەی پەرلەمانی عێراق هەمواری یاسای بودجە پەیوەندیدار بە پشکی هەرێمی کوردستان دەنگی لەسەر درا، ئەمەش دەروازەیەکی گرنگە بۆ کرانەوەی هێندێک گرێکوێرەی پەیوەست بە بودجە و مووچە.
ڕاشیگەیاند، بە پێی هەموارەکە، نەوتی هەرێمی کوردستان لە ڕێگەی کۆمپانیای بەبازاڕکردنی نەوتی عێراق (سۆمۆ) بە بۆری لە بەندەری جیهان دەفرۆشرێت، لە بەرانبەر تێچووی (١٦ دۆلار) بۆ هەر بەرمیلێک بۆ حەقدەستی کۆمپانیاکان.
وتیشی، “ئەگەر هەردوو حکومەت پابەند بن، ئەم هەمووارە دەبێتە هۆی نەمانی هیچ پاساوێک بۆ فرۆشتنی نەوت بە تەنکەر و بە قاچاخ لەلایەن لایەنەکانی دەسەڵاتەوە، کە داهاتەکەشی نادیار بوو، هەروەها هاتنی بەشە بودجەی هەرێمی کوردستان بە هەردوو بواری بەگەڕخستن و وەبەرهێنانەوە”.
ئاشكراشی كرد، ئەم هەموارە لە پاڵَ بڕیاری دادگای فیدڕاڵَی بۆ مووچە، پاڵپشتییەکی تر بۆ مسۆگەری مووچەی مووچەخۆرانی کوردستان دروست دەبێت بە بەشداری داهاتی نەوتی کوردستان لە خەزێنەی گشتی عێراق.
جەختیشی كردەوە، هەموو چاومان لەوەیە بەغدا و هەرێم پابەندی ئەرکەکانیان بن لە ( بڕیاری دادگای فیدراڵی و یاسای بودجە) و ئەم برسێتی و کولەمەرگییەی دەسەڵات بەسەر خەڵکیاندا سەپاندووە کۆتایی بێت.
