ئەمڕۆ پەرلەمانی عێراق دەنگی لەسەر هەمواری یاسای بودجە دا و دەست بە هەناردەكردنەوەی نەوتی هەرێم دەكرێتەوە، پسپۆڕێكی ئابووری دەڵێت: پەرلەمانتارانی كورد هەوڵ بدەن لە زیادكردنی بودجەی هەرێم پلەبەرزكردنەوە لەبەرچاو بگرن.
د. نەرمین مەعروف، ئەندامی لیژنەی دارایی لە پەرلەمانی عێراق ڕایگەیاند، ئەمڕۆ یەک شەممە ٢٠٢٥/٢/٢ لە دانیشتنی ژمارە ٤ی پەرلەمان دەنگدرا لەسەر هەمواری یەکەمی یاسای بودجەی فیدڕاڵی مادەی١٢/دووەم/ج کە تایبەتە بە تێچووی نەوتی هەرێم و لێرە بەدواوە هەناردەکردنی نەوتی هەرێم لەبەندەری جیهانەوە دەستپێدەکاتەوە بەڵام لەڕێگەی کۆمپانیای سۆمۆوە بەبازاڕی دەکرێت.
لای خۆشیەوە، ئومێد قەرەداغی، مامۆستای ئابووری لە زانكۆی سلێمانی ڕایگەیاند، پەرلەمانی عێراق هەناردەی نەوتی هەرێمی پەسەند کرد، ئەم نەوتە له ڕێگای سۆمۆ هەناردە دەکرێت، تێچوونی 16 دۆلار بۆ هەر بەمیلێک، هەرێم توانای هەناردەی نزیکەی 300 هەزار بەرمیل نەوتی ڕۆژانەی هەیە.
ئاماژەی بەوەشكرد، ئەم بڕیارە پەیوندی بە بڕی مووچەی هەرێمەوە نییە، بەڵام دەرفتێکە بۆ ئەوەی پشکی مووچەی هەرێم لە بودجەی عێراق لە 996 ملیارەوە بۆ ترلیونێک و 100 ملیار یان زیاتر بەرز بکەنەوە.
وتیشی، “زۆر گرنگە لەو زیادکردنەدا پەرلەمانتارانی کورد لە بەغدا تێچووی پلەبەرزکردنەوە لەبەرچاو بگرن، بەپێی پێویستی پلەبەرزکردنەوەی فەرمانبەرانی مەدەنی داوای زیادکردنی پشکی مووچە بکەن”.
