قایمقامی قەزای ناوەندی هەولێر ڕایگەیاند، بەهۆی كەمیی كارەبای نیشتمانی و داواكاریی خەڵك بۆ پێدانی كارەبای بەردەوام، نرخی ئەمپێرێك كارەبای مۆلیدە گەیشتووەتە 20 هەزار دینار.
نەبەز عەبدولحەمید، قایمقامی قەزای ناوەندی هەولێر، ئەوەی ڕاگەیاندووە، “مانگی ڕابردوو، کارکردنی مۆلیدە ئەهلییەکان زۆر بووە، بۆیە نرخی یەک ئەمپێر كەمترینی 16 هەزار و 500 دینارە و زۆرترینیش 20 هەزار دینارە”.
سەبارەت بە هۆكاری زۆریی پارەی مۆلیدە لە مانگی 1ی 2025، وتی: “كارەبای نیشتمانی كەم بووە، خشتەیەك نەبووە و بەردەوام مۆلیدە پێ كراوە، چونكە خەڵك داوای كارەبای بەردەوام دەكات، ئەوەش وای كردووە پارەی ئەمپێری مۆلیدە ئەهلییەكان زیاتر بێت”
بەپێی راگەیاندراوی وەزارەتی كارەبا، لە مانگی رابردوودا چەند جارێك كێشەیان لە پێگەیشتنی غاز لە كێڵگەی كۆرمۆر بۆ وێستگەكانی كارەبا دروست بووە كە ئەمەش وای كرد كارەبای نیشتمانی كەم ببێتەوە.
قایمقامی هەولێر بۆ میدیای پارتی ئەوەشی خستە ڕوو: “ئەو گەڕەكانەی پڕۆژەی ڕووناكی و كارەبای 24 كاتژمێرییان هەیە، بێكێشەن و پارەی مۆلیدەش نادەن”.
