هێڵی پاس بۆ چەند گەڕەکێکی هەولێر دابین دەکرێت

سەرۆکی سەندیکای گواستنەوە و گەیاندنی پارێزگای هەولێر ڕایگەیاند، هێڵی پاس بۆ چەند گەڕەکێکی هەولێر دادەنرێت کە تا ئێستا هێڵی پاسیان نییە.

سەید زەکەریا عەزیز، سەرۆکی سەندیکای گواستنەوە و گەیاندنی پارێزگای هەولێر بە میدیای پارتی ڕاگەیاند: “ئێستا لەناو شاردا 24 هێڵی پاس و نۆ هێڵی مینی پاس هەیە، کە رۆژانە هاتوچۆ بە هاووڵاتییان دەکەن”.

لەگەڵ فراوانبوونی هەولێر، هەندێک گەڕەک هەن تا ئەمڕۆ هێڵی گشتیی پاسیان نییە و هاونیشتمانیان ناچارن، ئۆتۆمبێلی خۆیان یان تاکسی بەکار بهێنن.

بە وتەی بەڕێوەبەری گواستنەوەی هەولێر، ئەو گەڕەکانەی بڕیارە هێڵی پاسیان بۆ دابینبکرێت پێکدێن لە؛ گەڕەکەکانی ژین، گوندی نیشتەجێببوونی کۆری، بەستۆرە و مەلاهۆمەر.

هێڵەکانی پاس لە هەولێر بەگوێرەی گەڕەکەکان کرێیان جیایە، لەنێوان 500 بۆ 750 دیناردایە.

جگە لە ناوخۆی هەولێر، کە ناوەندی شار، شەقامەکانی 30 مەتری، 60 مەتری، 100 مەتری تا سنووری شەقامی 150 مەتری دەگرێتەوە، لە دەرەوەی 150 مەتریش هێڵی دیکەی پاس هەیە، وەک هێڵەکانی بەحرکە، قوشتەپە و کەورگۆسک.