هێشتا وەزارەتی دارایی هەرێمی کوردستان و عێراق لەسەر کێشە داراییەکان ڕێکنەکەوتوون و بۆ سێیەم ڕۆژی لەسەریەک کۆدەبنەوە.
ئەمڕۆ یەکشەممە، هەردوو شاندی هەرێمی کوردستان و بەغداد بۆ تەواوکردنی کارەکانی پێداچوونەوە بە لیستی مووچە و پرسی خانەنشینی کۆدەبنەوە.
لە ڕۆژی هەینییەوە شاندی وەزارەتی دارایی هەرێم و عێراق کۆبوونەوەی چڕوپڕ دەکەن بۆ چارەسەرکردنی “کێشە هونەریەکان” و بە پێی ڕاگەیەندراوێکی وەزارەتی دارایی هەرێم، “چاوەڕێ دەکرێت لە نزیکترین کاتدا کارەکان تەواو بکەن”.
دوێنێش سۆران عومەر، ئەندامی لیژنەی ئابووری ئەنجومەنی ڕایگەیاند، بە هۆی ناکۆکییەکان لەسەر پرسی تەوتین و خانەنشینی، ئەنجامی کۆبوونەوەکانی هەینی ئەرێنی نەبوون.
ڕوونیشیکردەوە کە لە کۆبوونەوەکەدا لەسەر بابەتی کردنەوەی لقی بانکەکانی ڕەشید و ڕافیدەین لە هەرێمی کوردستان، گرژی لە نێوان هەردوو شاندا دروست بووە و وتیشی: “هەرێمی کوردستان نایەوێت لقی ئەو بانکانە بکرێنەوە”.
