ئەندامێکی پەرلەمانی عێڕاق لەبارەی تەوتین زانیاری ئاشکرا دەکات و دەڵێت”عێڕاق تەوتین بەسەر هەرێم دەسەپێنێت”.
سۆران عومەر، ئەندامی پەرلەمانی عێراق لە فراکسیۆنی کۆمەڵ، لە لێدوانێکی تەلەفیزیۆنیدا ڕایگەیاند، دارایی عێراق لەکۆبوونەوەی ئەمڕۆیدا بڕیاری ناردنی مووچەی مانگی یەکی دا، و بۆ مانگی دوو و مانگەکانی داهاتوو داواکاری تری هەیە و دەبێت هەرێم جێبەجیی بکات بۆ چارەسەری گرفتی مووچە.
ئاماژەی بەوەشکرد، دارایی عێڕاق، بۆ مانگی دوو جگە لە هەژماری بانکی و ناو و ژمارەی یوپی ئێن، داوای ئای بان دەکات، کە ئەمە ژمارەیەکی تایبەتە بە فەرمانبەر و لەوڕێگەیەوە دەتوانێت بەبێ گەڕانەوە بۆ هەرێم ڕاستەوخۆ هەژماری بانکیان بۆ بکاتەوە لە بانکە حکومییەکانەوە.
سۆران عومەر ڕاشیگەیاند، هەژماری من لە دابەشکردنی مووچە و ڕاکێشانی پارە دەمێنێتەوە، ئەو ژمارە فەرمانبەر و مووچەخۆرەی هەژماری منی بۆ کراوەتەوە دەبێت ژمارەی هەژمارەکەی و ئای بانی لە لیستی مووچە هەبێت و هەرکەس ژمارەی حسابی نەبێت تەمویلی مووجەی نابێت.
وتیشی، ئەمە هەنگاویکی باشە بۆئەوەی گرفتی مووچە چارەسەر بێت و بانکی ناوەندی و وەزارەتی دارایی تەمویلی ئەو بانکانە دەکات، وە دەبێت شاندی هەرێم بەڕوونی بە خەڵک بڵێن پرۆسەی تەوتین بەشێوەی ئیجباری بەسەر هەرێم جێبەجی دەکرێت.
ڕاشیگەیاند، پرسی مووچەی مانگی 12 لەلایەن وەزارەتی دارایی عێراق یەکلاکراوەتەوە و ئەو دەڵێت پارەم ناردووە، هاوکات بابەتی هاوتای خانەنشینی بابەتێکی قورسە چونکە هەرێم ناتوانێت بچێتە ژێرباری ئەو هاوتاکردنەوەیە.
