ساڵانە لە مانگی ڕەمەزاندا وەزارەتی بازرگانیی عێراق سەبەتەیەكی خۆراكی تایبەت بەو مانگە دابەش دەكات و هەرێمی كوردستانیش دەگرێتەوە، وەزیری بازرگانی هەرێم دەڵێت: هێشتا لایەنی عێراقی هیچی لەو بارەیەوە لەگەڵیان باس نەکردووە، بەڵام دەبێت هاوشێوەی ساڵانی ڕابردوو ئەمساڵیش ئەو سەبەتەی خۆراكە دابەش بكرێت.
كەمال موسلیم، وەزیری بازرگانی حكومەتی هەرێمی كوردستان بە ماڵپەڕی فەرمیی پارتی ڕاگەیاندووە، تاكو ئێستا عێراق بڕیاری له‌باره‌ی سەبەتەی خۆراكی مانگی ڕەمەزان نەداوە، بەڵام هاوشێوەی ساڵانی ڕابردوو مانگی ڕەمەزانی ئەمساڵیش سەبەتەی خۆراكی تایبەت بە مانگی ڕەمەزان بوونی دەبێت و ماددەكانی دیاری دەكرێن.
كەمال موسلیم وتیشی، دابەشكردنی سەبەتەی خۆراكی مانگانە لە ڕێگه‌ی بریكارەكانەوە بەردەوامە، بە هەموو ماددەكانییەوە.
ئاماژەی بەوەشكرد،، لەگەڵ لایەنی عێراقی باسمان لە بەرزكردنەوەی كوالێتی ماددەكانی خۆراك كردووە، بۆ ئەوەی هاووڵاتییان ڕەزامەند بن لەسەری، لایەنی عێراقیش باسیان لەوە كردووە كار دەكەن لەسەر بەرزكردنەوەی كوالێتی ماددەكانی خۆراك.
ساڵانە لە مانگی ڕەمەزاندا وەزارەتی بازرگانی عێراق ماددەكانی بەشەخۆراك زیاد دەكات و هەریەك لە ماددەكانی هێلكە و ئاردی سفر و نیسك و ماددەی دیكە دابەش دەكات.
