وەزارەتی دارایی هەرێمی کوردستان ڕایگەیاند، کۆبوونەوەکانیان بۆ چارەسەرکردنی “کێشە هونەرییەکان” لەگەڵ وەزارەتی دارایی عێراق لە بەغداد بەردەوامن.
ئەمڕۆ شەممە، وەزارەتی دارایی هەرێمی کوردستان ڕایگەیاند، بۆ ڕۆژی دووەم کۆبوونەوەکانی شاندی هەرێمی کوردستان و وەزارەتی دارایی عێراق لەشاری بەغداد بەردەوامن.
ڕوونیشیکردەوە کە “تیمە هونەریەکانی وەزارەتی دارایی هەرێمی کوردستان لەگەڵ تیمە هونەریەکانی وەزارەتی دارایی حکومەتی فیدراڵ بەردەوامن لە کۆبوونەوە بەمەبەستی چارەسەرکردنی کێشە هونەریەکان، چاوەڕێ دەکرێت لە نزیکترین کاتدا کارەکان تەواو بکەن”.
ئەمڕۆش سۆران عومەر، ئەندامی لیژنەی ئابووری ئەنجومەنی ڕایگەیاند، بە هۆی ناکۆکییەکان لەسەر پرسی تەوتین و خانەنشینی، ئەنجامی کۆبوونەوەکانی دوێنی ئەرێنی نەبوون.
ڕوونیشیکردەوە کە لە کۆبوونەوەکەدا لەسەر بابەتی کردنەوەی لقی بانکەکانی ڕەشید و ڕافیدەین لە هەرێمی کوردستان، گرژی لە نێوان هەردوو شاندا دروست بووە و تیشی: “هەرێمی کوردستان نایەوێت لقی ئەو بانکانە بکرێنەوە”.
