باڵی بزوتنەوەی گۆڕان لە گردی زەرگەتە، باڵەکەی دانا ئەحمەد تۆمەتبار دەکات بەوەی بڕوایان بە دەستووری ناوخۆیی گۆڕان نییە و ڕاشیدەگەیەنێت کە “بە وردی ئاگاداری هەموو پەیوەندییە ژێربەژێر و دەستوەردان و كارە ناپەسەندەكانی لایەنی بەرامبەرین”.
ئەمڕۆ شەممە، یاسین حەمەعەلی، ڕێکخەری ژووری هەڵبژاردنی بزوتنەوەی گۆڕان لە کۆنفرانسێکی ڕۆژنامەوانیدا لە گردی زەرگەتەی سلێمانییەوە ڕایگەیاند، کە ئەوان بەرەی دەستوورن و بەرگریی لە بەرنامەی سیاسیی گۆڕان و بۆچوونەکانی نەوشیروان مستەفا، ڕێکخەری کۆچکردووی حزبەکە دەکەن.
وتیشی، پرۆژەكانی نەوشیروان مستەفا تەنیا رێگایە كە بتوانێت بزوتنەوەی گۆڕان بخاتەوە سەر رێچكە تەندروستەكەی خۆی.
یاسین حەمەعەلی گۆڕانی گردەکەی زەرگەتەی بە “بەرەی دەستوور” وەسف کرد و ڕاشیگەیاند باڵەکەی دانا ئەحمەد کە بە لایەنی بەرامبەر ناوی بردن “بڕوایان بە بەرنامە و دەستووری گۆڕان نیە”.
وتیشی: “بە وردی ئاگاداری هەموو پەیوەندییە ژێربەژێر و دەستوەردان و كارە ناپەسەندەكانی لایەنی بەرامبەرین” بی ئەوەی ڕوونکردنەوەی زیاتر لەو بارەیەوە بدات.
یاسین حەمەعەلی ئامادەیی گۆڕانی گردەکەی زەرگەتەی بۆ هەر پرۆسەیەکی ئاشتەوایی لەگەڵ باڵەکەی دانا ئەحمەد دەربڕی کە بە هۆی بوونی بارەگاکەیان لە گەڕەکی کوردساتی سلێمانی، بە گۆڕانی کوردسات ناودەبرێن.
