بزووتنەوەی ئیسلامی ڕایگەیاند عیرفان عەلی لە میانی سەدانەکەیدا بۆ تورکیا ئامادەیی حزبەکەی بۆ سەرخستنی پرۆسەی ئاشتی دەربڕیوە.
مەکتەبی ڕابەری گشتی بزووتنەوەی ئیسلامی کوردستان ڕاگەیەندراوێکی دەربارەی سەردانەکەی عیرفان عەلی، ڕابەری گشتی بزووتنەوە بۆ تورکیا بڵاوکردەوە کە بەیاوەری شاندێکی مەکتەبی سیاسی و سەرکردایەتی حزبەکە ئەنجامی دا.
لە ڕاگەیەندراوەکەدا هاتووە: شاندەکە “سەردانی ئاکپارتی کرد و لەلایەن بەرپرسانی ئاکپارتی زۆر بەگەرمی پێشوازی لێکرا ، دواتر سەردانی وەزارەتی دەرەوەی تورکیای کردو لەلایەن نوح یڵماز جێگری وەزیری دەرەوەو عەلی ڕەزا گونەی، بەرپرسی دۆسیەی عێراق لە وەزارەتی دەرەوە پێشوازیان لێکرا”.
ئەوەشخراوەتەڕوو کە لە دیدارەکەدا “تاوتوێی چەندین بابەتی گرنگ کرا لەنێوانیاندا پڕۆسەی ئاشتی لە تورکیا کە لەلایەن (ئەردۆغان و دەولەت باخچەلی) پێشکەش کراوەو لەڕێگای دەم پارتی دیداری عەبدوڵا ئۆجالان کراوە”.
ڕابەری گشتی بزووتنەوە “وێڕای دەستخۆشی ئامادەیی خۆی و بزووتنەوەی پیشاندا بۆ سەرخستنی ئەو پڕۆسەیە هیوای خواست ئەم پڕۆسەیە بەسەرکەوتوانە بەڕێوە بچێت و بگاتە کۆتا”.
لە ڕاگەیەندراوەکەی بزووتنەوەی ئیسلامیدا هاتووە کە عیرفان عەلی دواتر سەردانی سەرۆکی پارتی سەعادەت و یەنی ڕەفاهی کردووە.
