ڕوانگەی سووری بۆ مافەکانی مرۆڤ، ئەمڕۆ هەینی ڕایگەیاند، شانەکانی داعش جارێکی تر چالاک دەبنەوە.
ڕوانگەکە کە پشت بە تۆڕێکی چالاکوانانی ناو سووریا دەبەستێت دەڵێت، چەکدارانی داعش هێرشیان کردووەتە سەر ناوەندە سەربازییەکان و بۆسەیان بۆ ئۆتۆمبێلە سەربازییەکان لە ناوچەکانی ژێر دەسەڵاتی بەڕێوەبەرایەتی خۆسەر لە باکوور و ڕۆژهەڵاتی سووریا داناوە.
بە گوێرەی ڕوانگەکە، هێرشەکانی داعش لەکاتێکدایە کە هێزەکانی سووریای دیموکراتیک (هەسەدە) لە ئێستادا هەوڵی وەستاندنی هێرشەکانی سوپای نیشتمانی سەر بە تورکیا لە ڕۆژهەڵاتی حەلەب دەدەن.
ئەو ڕوانگەیەی چاودێری شەڕو پێکدادانەکانی ناو سووریا دەکات لە ڕاپۆرتەکەیدا دەڵێت، لە سەرەتای ساڵی 2025ەوە، داعش 16 ئۆپەراسیۆنی ئەنجامداوە، لەوانە هێرشی چەکداری و بۆردومانکردنی ناوچەکانی ژێر دەسەڵاتی بەڕێوەبەرایەتی خۆسەر لە باکوور و ڕۆژهەڵاتی سووریا.
بەپێی زانیارییەکانی ڕێکخراوەکە لەو هێرشانەدا بەلاینی کەم نۆ کەس کوژراون.
هاوپەیمانی نێودەوڵەتی بە سەرۆکایەتی ئەمریکا لە شەڕی دژ بە داعش، هاوکاری لەگەڵ هێزەکانی سووریای دیموکراتیک دەکات.
واشنتۆن ڕایگەیاندووە، هێزەکانی (هەسەدە) بە سەرۆکایەتی یەکینەکانی پاراستنی گەل (یەپەگە) هاوپەیمانێکی گرنگن لە شەڕی داعشدا.
