هەڵبژاردنی خولی نوێی ئەنجومەنی نوێنەرانی عێراق 45 رۆژ بەر لەکۆتایی ئەم خولە دەبێت و زیاتر لە 350 حزب بەشداری تیادا دەکەن.
دادوەر عامر حسێنی، سەرۆکی ئیدارەی هەڵبژاردن ئاشکرایدەکات ئەو حزبانەی باڵی سەربازییان هەیە ناتوانن بەشداری بکەن و یاساکە رێگەیان پێ نادات.
لە نوێترین چاوپێکەوتنی دا، دادوەر عامر حسێنی لەگەڵ ئاژانسی هەواڵی عیراقی دەڵێت: “سەرۆک وەزیران چاودێری و پشتیوانی کۆمسیۆنی باڵای سەربەخۆیی هەڵبژاردنەکانی عێراق دەکات تا بەزوویی کاروبارەکانی هەڵبژاردنی داهاتوو ئامادە بکرێن”.
وتیشی: “لەقۆناغی کۆتایی چاکسازی ئامێرەکانی کۆمسیۆنداین و ئەنجومەنی وەزیران دەنگی داوە لەسەر بودجەی هەڵبژاردن و وادەی هەڵبژاردنیش 45 رۆژ بەرلەوادەی ئەم خولەیە و دەکەوێتە 25-11”.
ئەوەش دەڵێت: “نیەتێک هەیە بۆ هەموارکردنەوەی یاسای هەڵبژاردنەكان و پێویستە بەر وادەی دیاریکراوی وادەی هەڵبژاردن بێت”.
بە وتەی ئەو بەرپرسەی کۆمسیۆنی باڵای سەربەخۆیی هەڵبژاردنەکانی عێراق: “319 حزب تۆمارن و 46 پارتی نوێ دامەزراون و تۆمارن و دەتوانن بەشداری بکەن، بەڵام یاساکە رێگە بەو حزبانە نادات کە باڵی سەربازییان هەیە”.
