سەرۆکایەتی کۆماری عێراق لەسەر دەنگۆی دەستگیرکردنی سکرتێری سەرۆک کۆماری عێراق ڕوونکردنەوەیدا و دەڵێت”ئەوەی دەستگیرکراوە سکرتێر نییە بەڵکو یەکیکە لە پاسەوانەکانی سەرۆک کۆمار”.
سەرۆکایەتی کۆماری عێراق ڕۆژی پێنجشەممە ڕوونکردنەوەیەکی بڵاوکردەوە و تێیدا هاتووە، هەندێک لە دەزگاکانی ڕاگەیاندن هەواڵی دەستگیرکردنی چالاک سەباح عومەریان لە 30ـی کانوونی دووەمی 2025 بڵاوکردەوە و ئاماژەش بەوە کرا کە دەستگیرکراوەکە سکرتێری سەرۆک کۆمارە، ئەو دەنگۆیە دوورە لە ڕاستییەوە و سکرتێری سەرۆک کۆمار پەیوەندی بەو بابەتەوە نییە.
سەرۆکایەتی کۆمار ئاماژەی بەوەشکرد، ئەو کەسەی کە پێشتر باسمان کرد، ئەندامی پاراستنی سەرۆک کۆمارە و سکرتێری تایبەتی خۆی نییە، سەرۆکایەتی کۆمار پێشتر لە 26ـی تشرینی دووەمی 2024 بەیاننامەیەکی سەبارەت بەو بابەتە بڵاوکردبوەوە و ڕوونیکردبووەوە، کەسێک کە لە دەستەی پاسەوانی سەرۆک کۆمارە وەک سکرتێری سەرۆک کۆمار خۆیا ناساندووە و بەرتیلی وەرگرتووە بۆ بەردانی تاوانبارێک و بەڵێنی بێ بنەمای داوە، هەرئەوکات سەرۆکایەتی کۆمار فەرمانی لێپێچینەوەی بۆ دەرکردووە و ڕەوانەی لایەنی پەیوەندیدار کراوە.”.
سەرچاوەیەکی ئاگاداری قەزایی ئەمڕۆ پێنجشەممە هەواڵی دەستبەسەرکردنی فەرمانبەرێکی سەرۆکایەتی کۆماری بە تۆمەتی وەرگرتنی بەرتیل لە بەرامبەر بەڵێنێکی درۆ بۆ ئازادکردنی تۆمەتبارێک بڵاوکردەوە.
