نوخشە ناسح، قایمقامی هەڵەبجە لە بارەی ئەو دەنگۆیانەی بڵاوکراونەوە کە بووەتە پارێزگاری هەڵەبجە بە وەکالەت ڕایگەیاند، تا نیوەڕۆی ئەمڕۆش دەوامی کردووە هەر قایمقام بووە.
نوخشە ناسح، بە “تۆڕی میدیایی خەڵک”ی ڕاگەیاند: تا نیوەڕۆی ئەمڕۆ کە دەوامی کردووە هەر قایمقامی هەڵەبجە بووە.
لە بارەی ئەو دەنگۆیانەی باس لەوە دەکەن کە کرابێتە پارێزگاری هەڵەبجە بە وەکالەت، نوخشە ناسح وتی: هیچ شتێکی بە فەرمی لەسەر ئەو بابەتە بۆ نەهاتووە و لە دەوامی خۆی وەک قایمقامی هەڵەبجە بەردەوام دەبێت.
پێشتر ئازاد تۆفیق، پارێزگاری ئێستای هەڵەبجە ماڵئاوای لە پۆستەکەی کرد و رایگەیاند، چیتر بەردەوام نابێت، خانەنشین دەبێت.
ئازاد تۆفیق، پارێزگاری هەڵەبجە لەدایكبوی ساڵی 1963ـە و ئێستا تەمەنی 62 ساڵە، شاهێن حەمە رەزا، جێگری پارێزگار، لەدایكبووی 1964ـە و ئێستا تەمەنی 61 ساڵە، بەگوێرەی بڕیارە نوێیەكەی حکومەتی هەرێم كە تەمەنی خانەنشینی بۆ 60 ساڵ كەمكردەوە، هەردووكیان لە ڕووی یاساییەوە خانەنشین دەبن.
