هێرشەكانی توركیا و گرووپە چەكدارەكانی بۆ سەر ڕۆژئاوای كوردستان و هێزەكانی سووریای دیموكرات “هەسەدە” بەردەوامە و لە بۆردومانی بەنداوی تشرین و كۆبانێ دەیان هاووڵاتی مەدەنی شەهید و بریندار بوون و هەسەدە-ش لە تۆڵەی ئەو بۆردومانەدا گورزێكی گەورە لە توركیا دەوەشێنێت.
شاندی ڕاگەیاندنی هەسەدە بڵاویكردەوە، هێزەکانی ئاسایشی ناوخۆ و هێزی سەربازی بۆ گوندەکانی باشووری گرێ سپی و گرێ لیكی دەنێرن بۆ ئەوەی دەست بکەن بە كێوماڵكردنی ناوچەکە و لەناوبردنی گرووپە چەكدارەكان.
ڕاشیگەیاندووە، “داگیرکەری تورکیا بە چەکی قورس بەنداوی تشرین بۆردومان دەکات، لەكاتێكدا سەدان دانیشتووی قەزای ئەلجەزیرە بەرەو بەنداوەکە بەڕێكەوتوون وەك پاڵپشتێكی پارێزەری مرۆیی، كە بەهۆیەوە چەندین هاوولاتیی بریندار بوون” ئەمە سەرەڕای بۆردومان كردنی شارۆچكەی سیرین لە باشووری كۆبانێ، كە 8 كەس شەهید و 20 كەس بریندار بوون.
ئاشكراشی كردووە، “لە ئۆپەراسیۆنێکی نهێنیدا لەلایەن هێزەکانی کۆماندۆوە، كە لەسەر میحوەری قەبر ئیمۆ لە دەوروبەری پردی قەرقۆزاق ئەنجامدرا، لە ئەنجامدا ٧ چەكداری سەر بە گرووپەكانی ئەردۆغان كوژران”.
لای خۆیشەوە، ڕوانگەی سووری بۆ مافەكانی مرۆڤ بڵاویكردەوە، لە سنوری حەسەکەی ڕۆژاڤای کوردستان ئەفسەرێکی سوپای تورکیا کوژرا و ڕادارێکی تورکیا تیکشکێندرا.
