بەپێی سەرچاوەیەکی باڵا لە حکومەتی ڕاگوزەری سووریا داواکاری سووریا لە ڕووسیا ئاشکرا دەکات سەبارەت بە ڕادەستکردنەوەی ئەسەد.
ئاژانسی هەواڵی ڕۆیتەرز، ئەمڕۆ چوارشەمە لە زاری سەرچاوەیەکی ئاگاداری سووریاوە بڵاویکردەوە، سەرۆکی ئیدارەی نوێی سووریا، ئەحمەد شەرع، داوای لە ڕووسیا کردووە، بەشار ئەسەد، سەرۆکی لەکارلادراوی سووریا ڕادەست بکات.
ئەو سەرچاوەیە ئەوەشی خستەڕوو، “لە یەکەم دانوستاندا کە میخائیل بۆگدانۆڤ جێگری وەزیری دەرەوەی ڕووسیا لە سەردانەکەیدا بۆ دیمەشق ئەنجامیدا تاکە ڕێککەوتنێک کە لەگەڵ لایەنی ڕووسیا ئەنجامیدا، درێژەدان بوو بە گفتوگۆکان “.
لای خۆیەوە، دیمیتری پێسکۆڤ، وتەبێژی کۆشکی سەرۆکایەتی کۆماری ڕووسیا ، ئەمڕۆ چوارشەممە، ڕەتیکردەوە هیچ لێدوانێک لەسەر ئەو هەواڵانە بدات کە گوایە “ئیدارەی نوێی سووریا داوای ڕادەستکردنەوەی بەشار ئەسەدی کردووە، ڕاشیگەیاندووە ئەم بابەتە بەهیچ جۆرێک جێی گفتوگۆنییە لە ئێستادا.
کرێملین دووپاتی کردەوە کە “مۆسکۆ بەرەو پێشەوە دەچێت لە بنیاتنانی گفتوگۆ لەگەڵ ئیدارەی نوێی سووریا، ئەمەش وەک ئاماژەیەک بۆ پێشهاتەکانی گۆڕەپانی سیاسی دیمەشق”.
