بەهای دۆلار بەرامبەر بە دیناری عێراقی بەردەوامە لە دابەزین و ئەمڕۆش بەهاكەی هاتە خوار 150 هەزار دینار.
ڕەوەند میرزا لە بازاڕی دۆلارەكەی سلێمانی بۆ (خەڵك) ڕایگەیاند، بەهای دۆلار ڕوووی لە دابەزینی زیاتر كردووە و دوانیوەڕۆی ئەمڕۆ بەهای 100 دۆلار بە 149 هەزار و 850 دینار مامەڵەی پێوەدەكرێت.
ڕاشیگەیاند، لیرەی سووری بەرزبۆتەوە و 163 هەزار لیرە بە ملیۆنێك دیناری عێراقییە.
دەربارەی تمەن وتی، “تمە بەردەوام لە شكانە و 100 دۆلار بە 8 ملیۆن و 200 هەزار تمەنە”.
لاى خۆشیەوە، جەبار گۆران، وتەبێژی بازاڕی دراوەكەی سلێمانی بۆ میدیاکان وتی، “بەراورد بە دوێنی دوو شەممە، نرخی دۆلار لەبازاڕەكاندا 750 دینار دابەزیوە، كە ئێستا نرخەكەی بە 149 هەزار دینار و 700 دینار مامەڵەی پێوە دەكرێت هۆكارەكەشی پەیوەندی بە خستەڕوی دۆلارەوە هەیە كە بانكی ناوەندی عێراق بڕێكی زیاتری خستوەتەڕوو”.
وتیشی، “یەكێكی دیكە لە هۆكارەكانی دابەزینی نرخی دۆلاری ئەمریكی پەیوەندی بە قەبارەی حەواڵەیە بۆ دوبەی هەیە، كە ئێستا بڕەكەی كەمی كردووە”.
