ئەنجوومەنی ڕاژەی گشتی هەرێم، سیستەمی داتابەیسی پێشکەوتوو بۆ ڕێکخستنەوەی ڕاژەی گشتی و دامەزراندنی نوێ و پلەبەرزکردنەوە پەیڕەو دەکات.
سیراج بارزانی، سەرۆکی ئەنجوومەنی ڕاژەی گشتی بە فەرمانگەی میدیا و زانیاریی حكومەتی هەرێمی كوردستانی ڕاگەیاندووە، “سەرقاڵی دانانی بەردی بناغەی داتابەیسێکین بۆ بەدیجیتاڵکردنی دۆسیەی کەسیی فەرمانبەران، ئەمەش ئامرازێکی گرنگی کۆنتڕۆڵکردنی کاروباری فەرمانبەران و دووبارە ڕێکخستنەوەی میلاکاتی وەزارەتەکانە.”
دەشڵێت: “بەپێی پێویستی وەکو ئەنجوومەنی ڕاژەی گشتی، دەسەڵاتمان پێ دراوە پڕۆسەی دامەزراندن و پلەبەرزکردنەوە بەڕێوە ببەین، ئەمانە بە دەق لە یاسادا هاتوون و هەمووی لەسەر ئەو پێوەر و بنەما یاساییانەیە کە لە پەرلەمانی عێراق دەرچوون.”
ڕاشیگەیاند: “هەوڵ دەدەین لەسەر بنەمای ئەو یاسایە میلاکاتی وەزارەتەکان دەستنیشان بکرێت، کە پڕۆسەیەکە لەنێوان ئێمە و وەزارەتی دارایی و ئابووری، بۆ ئەوەی بتوانین بە شێوەیەکی زانستی لەسەر بنەمای یاساکان دووبارە پڕۆسەی دامەزراندن بگەڕێتەوە سەر ڕێڕەوی ڕاستی خۆی، کە هێنانی فەرمانبەرە بۆ ناو کەرتی گشتی لەسەر بنەمای زانستی، پسپۆڕی و توانا.”
لەبارەی دامەزراندنیشەوە، وتی: “پێشبینی دەکەین سەرووی 100 هەزار کەسێکمان هەبێت لە هەرێمی کوردستان کە دەرچووی دانەمەزراون، بەپێی پێداویستیی وەزارەتەکان ئیمەیڵیان بۆ دەنێرین، پڕۆفایلیان لای ئێمە دەبێت و دەزانین تایبەتمەندییەکانیان چییە و بۆ چ کارێک گونجاون.”
دەشڵێت: “مەبەستی سەرەکییمان لەو سیستەمەدا ئەوەیە دادپەروەری لە دامەزراندن هەبێت و تاکە بنەما پسپۆڕی و توانا و لێهاتوویی بێت.”
