ناڕەزایەتییەكانی مامۆستایان دەچێتە قۆناغێكی دیكەوە و مامۆستایان لەبەردەم بارەگای نەتەوە یەكگرتووەكان لە سلێمانی خێمە هەڵدەدەن و مان لە خواردن دەگرن.
مامۆستا دڵشاد میرانی، ئەندامی دەستەی داكۆكی لە مامۆستایان و فەرمانبەرانی ناڕازی ڕایگەیاند، چالاكییەكانمان دەستپێدەكاتەوە و دەمانەوێت نەتەوە یەكگرتووەكانیش بخەینە ژێر بەرپرسیارێتی لەو زوڵم و ستەمەی حكومەتی هەرێم بەرامبەر بە فەرمانبەران و مووچەخۆران دەیكات و هەروەها حكومەتی ناوەندییش دەیكات، كە بەپێی داتاكان دەڵێت مووچەی مانگی 12ی ناردووە و چۆن قبوڵی ئەكات لە حكومەتی هەرێم نەیدات بە فەرمانبەران.
ڕاشیگەیاند، بەبێ گەڕاندنەوەی داهاتی نەوتی و نانەوتی، حكومەتی هەرێم پارەی ناردووە و ئەوە نزیكەی دوو مانگە زیاتر لە ترلیۆنێك و 61 ملیار دینار لەلایەن حكومەتی هەرێمەوە دەستی بەسەرداگیراوە و نابێت فەرمانبەران قبوڵی بكەن.
وتیشی، “دوای چەندین بەربەستی هێزە ئەمنییەكان، بە خۆڕاگری فەرمانبەران و مامۆستایان خێمەمان هەڵدا و دواتریش دەیبینن چەندین چالاكی دەكەین، كە لە 10 ساڵی ڕابردوودا وێنەی نەبووە”.
لە ڕۆژی یەك شەممەوە، كە وەرزی دووەمی خوێندن دەستی پێكردووە مامۆستایان لە سنووری سلێمانی و هەڵەبجە و گەرمیان و ڕاپەڕین و كۆیە دەستیان بە بایكۆت كردووە و بڕیارە لە ئەمڕۆوە دەست بە هەڵدانی خێمە بكەن و دواتر دەست بە مانگرتن لە خۆراك دەكەن.
