کەشناسی هەرێم ڕەوشی کەشوهەواو پلەکانی گەرمای ئەمڕۆ و سبەینێ چوارشەممەی بڵاوکردەوە و کەشناسێکی کوردیش دەڵێت، شەپۆلی بەفروباران لە چارەکی یەکەمی مانگی شوبات ناوچەکانی هەرێم دەگرێتەوە.
بەپێی ڕاپۆرتی کەشناسی هەرێم، ئەمڕۆ سێشەممە ئاسمان ساماڵ و پەڵە هەور دەبێت، پلەکانی گەرما نزیک دەبێتەوە لە تۆمارکراوەکانى دوێنێ.
باسی لەوەشکردووە: سبەینێ چوارشەممە ئاسمان بەگشتى ساماڵ و پەڵە هەور دەبێت، پلەکانی گەرما نزیک دەبێتەوە بەراورد بە تۆمارکراوەکانى ئەمڕۆ.
لای خۆیەوە شاڵاو هیدایەت، شارەزا لە بواری کەشناسی بە “تۆڕی میدیایی خەڵک”ی ڕاگەیاند: ئاماژەکانی جێگیر بوونی ئەو شەپۆله باران و بەفرە باشەو گەڕانەوەی سیستەمێکی تەڕ دەرکەوتووە.
وتیشی: “ئەویش لەنێوان چارەگە سەرەتای مانگی دوو سیستەمێکی پەستان بەرزی بەهێز لەمەغریبی عەرەبیەوە واتا باکوری ئەفەریقاوە باڵادەست دەبێت و بەرەو ناوچەکانی خۆرئاوای ئەوروپا فەره نساو ئیسپانیاو بەریتانیاو ئایسلەندا چوونەوەی ئەو بەرزە پەستانە بۆ مەغریب و خۆرئاوای ئەوروپا بەشێکی تری زۆری ئەوروپا ڕێ بۆ هاتنەوەی تەوژمە هەوایە ساردەکان دەکات بێنە سەر ڕۆژهەڵاتی ناوەڕاست ببنەوە هۆی دروستبوونی شەپۆلەکانی دابارین بۆ ئەو ماوەیە و گەڕانەوەی سیستەمی تەڕ”.
باسی لەوەشکرد: ماوەی دوو ڕۆژێکە ڕەشەبا هەیە ئەویش نیشانەی دڵخۆشکەرو ئاماژەی گۆڕانکارییە لەداهاتوویەکی نزیکدا بە هاتنەوەی شەپۆلەکانی دابارین چونکە سیستەمی پەستان بەرز لەناوچەکانمان بەرە و دابەزینە و هەروەها نزیک بوونەوەی سیستەمی نزمە پەستان لێمان.
بەرزترین پلەکانی گەرمای پێشبینیکراو بە پلەی سیلیزی:
هەولێر: 18 پلەى سیلیزى
سلێمانی: 15 پلەى سیلیزى
دهۆک: 18 پلەى سیلیزى
کەرکوک: 20 پلەى سیلیزى
زاخۆ : 18 پلەى سیلیزى
هەڵەبجە: 18 پلەى سیلیزى
حاجی ئۆمەران: 1 پلەى سیلیزى
سۆران: 15 پلەى سیلیزى
گەرمیان: 20 پلەى سیلیزى
