ئەو خانەنشینانەی لە ساڵی 2003 بۆ 2014 خانەنشین كراون و خزمەتییان كەمكراوەتەوە، مووچە و خزمەتیان راست دەكرێتەوە و مووچەکانیان زیاد دەبێت.
ئیسماعیل موخلیس، جێگری سەرۆكی لقی هەولێری یەكێتیی خانەنشینان بە میدیای پارتی ڕاگەیاند: “فەرمانگەی خانەنشینی ئاگاداریان كردینەوە، ئەو خانەنشینانەی، كە لە كاتی هاوتاكردنی مووچەكانیاندا مووچەیان كەمكراوەتەوە، بەتایبەت ئەوانەی خزمەتیان لەسەرووی 45 ساڵ بووە و كەمكراوەتەوە بۆ 35 ساڵ، ئەوانە خزمەتەكانیان چاكدەكرێتەوە”.
ئاماژەی بەوەشدا: “هەر خانەنشینێك ئەو كێشەی هەیە، دەبێت بەپەلە سەردانی فەرمانگەی خانەنشینی بكات و كێشەكەی چارەسەر دەكرێت”.
ئەو بەرپرسە ڕوونیشیكردەوە، ئەوانەی ئەو كێشەیان هەیە، دەبێت ناسنامەیان بۆ فەرمانگەی خانەنشینیی هەولێر ببەن، وتیشی: “ئەوانە ناویان دەنووسرێت و خزمەتەكەیان بۆ ڕاست دەكرێتەوە و مووچەشیان زیاد دەبێت”.
بەرپرسەكەی یەكێتیی خانەنشینان ئاشكراشیكرد: “دوای وردبینی و تۆماركردن، زیادبوونی خزمەتیان، لە 1ی تەمموزی 2024وە بۆیان هەژمار دەكرێت و بەمەش مووچەیان زیاد دەكات و خزمەتیشیان زیاد دەبێت و جیاوازیی مووچەشیان بۆ خەرج دەكرێت”.
ئیسماعیل موخلیس ئاشکراشی کرد: “ئەو خانەنشینانەی ئەو كێشەیان هەیە، ژمارەیان هەزاران خانەنشینە”.
لە نووسراوێكی یەكێتیی خانەنشیناندا، كە رۆژی 22ی1ی 2025 بۆ وەزارەتی دارایی رەوانە كراوە، ئەوە خراوەتە ڕوو كە: “ئەوانەی پێش ساڵی 2014 تا 2003، خانەنشین كراون، لە فەرمانگەكانی خانەنشینی خزمەتییان لە 40 ساڵ بۆ 35 ساڵ كەمكراوەتەوە و بە یاسای 2006 مامەڵەیان لەگەڵدا كراوە و خانەنشینیان بە 80% ئەژمار كراوە، لەكاتێكدا بەپێی یاسای ژمارە 9ی ساڵی 2014، ئەوانە دەبێت بە 100% خانەنشین بن”.
دوای هاوتاکردن، كەمترین مووچەی خانەنشینان لەنێوان 420 بۆ 600 هەزار دینارە.
