زۆر کەس ئارەزووی ئەنجامدانی نەشتەرگەری جوانکاری دەکەن بۆ گۆڕینی شێوەی بەشێک لە ئەندامانی جەستەیان بۆ باشترکردنبێت یان بۆ جوانکاری.
هەندێک کەس بۆ باشترکردنی دەرکەوتنیان پەنا دەبەنە بەر نەشتەرگەری لووت، بەڵام ئەم نەشتەرگەریانە مەترسیدار دەبن ئەگەر کەسەکە تووشی هەندێک حاڵەتی پزیشکی بووبێت.
پزیشکی نەشتەرگەری جوانکاری ” تیگران” دەڵێت، پێویستە نەشتەرگەری لووت لەکاتێکدا ئەنجام بدرێت کە کەسەکە باری تەندروستی باش بێت، هەروەها پێویستە پشکنینی ورد پێش ئەنجامدانی ئەو نەشتەرگەریانە ئەنجام بدرێت، چونکە ئەنجامدانی نەشتەرگەریەکە بە بوونی هەندێک نەخۆشی ڕەنگە ببێتە هۆی ئاڵۆزیی تەندروستیی گەورە.
ئاماژە بەوەشدەکات، لە حاڵەتەکانی تووشبوون بە نەخۆشییە سەختەکانی دڵ و خوێنبەرەکان، وەک بەرزی فشاری خوێنبەرەکان، یان جەڵتەی دڵ یان لەکارکەوتنی دڵیش هاوکات، ئەگەر کەسەکە تووشی وەرەم، یان نەخۆشی شەکرە بووبێت ، یان حاڵەتی خوێن مەین-ی هەبێت ئەوا ئەم نەشتەرگەرییە قەدەغەیە، هەروەها ئەگەر کەسەکە تووشی نەخۆشی هەناسە توندی بووبێت یان هەوکردنێکی توندی هەبوو ئەم جۆرە نەشتەرگەرییەی لێ قەدەغەیە.
ئەو پزیشکە هەندێک حاڵەتی تریش باسدەکات، کەتێیدا نەشتەرگەری لووت قەدەغە دەکرێت وەک: دووگیانی و شیرپێدان لەم حاڵەتانەدا جەستەی ژنەکە تووشی گۆڕانکاری هۆرمۆن دەبێت کە ڕەنگە کاریگەری لەسەر چاکبوونەوەی شانەکان هەبێت دوای نەشتەرگەرییەکە و ئەمەش ڕەنگە ببێتە هۆی ئاڵۆزییەکی گەورە.
زۆرێک لە پزیشکان ئاماژە بە گرنگی پەیڕەوکردنی چەند ڕێکارێکی گرنگ دەکەن پێش ئەوەی پزیشک نەشتەرگەری لووت ئەنجام بدات، لەوانە بە وردی پێداچوونەوە بە مێژووی پزیشکی کەسەکە، گرتنی تیشکی ئێکس بە وردی ناوچەی لووت لە گۆشەی جیاوازەوە، دڵنیابوون لەوەی کە کەسەکە تووشی نەخۆشی درێژخایەن نەبووبێت ، و ئەنجامدانی پشکنین بۆ پشتڕاستکردنەوەی کە کەسەکە تووشی نەخۆشی شەکرە، نەخۆشیەکانی خوێن مەین، یان هەوکردنی جگەری ڤایرۆسی نەبووە.
